Буттал КIанттул цIанийсса Хъун дяъвилий Ххувшаву ларсун 80 шинан хасну, мартрал 9-нний МахIачкъалалийн бувкIунни «Поезд Победы». Вокзалданий поезд хьунабавкьунни ДР-лул ХIукуматрал председательнал хъиривчутал Рамазан Жяъпаровлул ва Муслим Телякавовлул, шагьрулул мэр Юсуп Умавовлул, ДР-лул жагьилтурал иширттал министр Камил Саидовлул, республикалул Ветерантурал советрал председатель МахIарам Аьлиджановлул, жяматийсса патриот суккушиннардал вакилтурал ва юнармейцынал.
Шиккун бувкIминнал кIицI лавгунни, жагьилсса ник тарбия давриву хъуннасса агьамшиву дусса давуну хъанахъишиву ретро-поезд хьунабакьаву.
– Буттал КIанттул цIанийсса Хъун дяъви байбивхьусса чIумал, Ватан душманная дуруччин 180 азарунния ливчусса дагъусттанлувтал лавгссар, бачIи зана къавхьуссар.
Жула Совет Союзрал 62 Виричу уссар. Дяъвилул цIараву цикссагу вирттаврал къучагъшиву ккаккан дурссар. Та дяъвилий совет халкьуннал ларсъсса Ххувшаву абадлий тарихраву личIантIиссар, – увкунни МахIарам Аьлиджановлул.
ХIакьинусса кьини дунияллийсса цавагу музейраву дакъар «Поезд Победылуву» кунна Хъун дяъвилул тарихрая бусласисса чIярусса композицияртту.
Ххувшаврил поездрал цалчинсса аьрххи хьуну бур 2020-ку шинал. Муния шийнмай поезд бивну бур Аьрасатнал ва Белоруссиянал 80-нния ливчусса шагьрурдайн.
Проект иширайну зузи дурну дур «Невский баталист» тIисса творчествалул мастерскойлул командалул «Красный квадрат» тIисса медиагруппардащал цачIуну.
Поездрал цалчинмур вагондалувусса композицияртту дур дяъви байбишин хьхьичIсса, дуниял паракьатсса, инсантал, ссалчIав буруккин бакъа, цала-цала къайгъурдаха зузисса чIуннардия бусласисса. КIилчинмур вагондалувусса выставка хас дурну дур совет заманнул халкьуннал кьянкьа-кьурчIишиврул, къучагъшиврул лишандалун ккаллисса Брест-къалалун.
Шамилчинмур вагондалуву совет аьрал най бур душманная Ватан дуруччин. Аьралийтурал каруннаву бур, дяъвилий нажагьлий жан дулун багьарчангу, цивппа ца буссарив бусласисса документру.
Мукьилчинмур вагондалуву дур Москав шагьру буручлай, къуйрду дуклай бивкIминнансса композицияртту.
Ххюйлчинмур вагондалуву бур оьсса тахсиркаршивуртту дуллай бивкIсса ишру дакIнин бичлачисса концлагерьданувусса суратру.
Ряххилчинмур вагон бур армиялий янна-чурх шюшайсса, санитар-эпидемиологиялул кьанунну дуруччаврин хас дурсса композицияртту дусса. Арилчинмуниву аьралий штаб тIивтIуну бур. Мяйлчинмуниву дур Японнал милитаристътурал дуллай бивкIсса тахсиркаршивурттая бусласисса композицияртту. УрчIилчинмур вагондалуву бур Нюрнбергский трибунал. Махъва-махъмур, ацIилчинмур, вагон бур Бюхттулсса Ххувшаву ласаврин хас бувсса.
Поездрай тамаша бан бувкIминнаща бюхълай бия, вагоннавух бувккун, гьарзат ххал дан.
Лажтг хIадур дурссар Имара Саидова
