Майрал 23-нний Каспийскалий, Аьли Аьлиевлул цIанийсса спортрал чIалъаь-къатраву Дагъусттаннал ва АьсатIиннал лачIунбуккултрал матч хьунни. Ва хас дурну дия Дунияллул халкьуннал дянивсса лачIун буккаврил кьинилун. Хъуннасса уттарашинна дия ва кьини спорткомплексраву увкуну кутIа бансса иш бакъая, ххюазара инсан лагайсса чIалъаь щап куну бувцIуну бия. Диялсса ажиотаж дия.
ЧIявусса агьали ареналийн буххан къавхьуну кьатIувва ливчIуна. ННТ-лул корреспондент Кьурбан РахIимовлул ккаккан дурна агьалинал ккучундалувух ареналийн ххуллу ласласисса UFC-лул чемпион Ислам МахIачевлул видеосуратру. ЧIявусса халкь батIаврил ца савав, хьхьичI кьини Яруссаннал театрданул хьхьичIсса майданнив, командарттал дурсса пресс-конференцияр тIий бия спортрал комментатортал. Пресс-конференциялий гьуртту хьуссия бяст-ччаллил сакиншинначитал, тренертал, машгьурсса хъамал. Вайннавух цалчин Дагъусттаннайн увкIсса, ххюйла Олимпий чемпион хьусса кубинец Михаин Лопес. Матчрайн увкIуна цамагу машгьурсса спортсмен, Олимпиадалий арцул медаль ларсъсса UFC-лул талатала Йоэль Ромеро. Тархъаншиврул жазиралиясса биюлт бакъагу, бия цаймигу машгьурсса хъамал. Вайннан цинявннан дакIний личIансса сувенирду дуллуна лачIун буккаврил Федерациялул хъунама Оьмар Муртузялиевлул ва спортрал министр (врио) Сажид Сажидовлул. Матчрай ххув хьуна Дагъусттаннал команда. Олимпий чемпионтурал Заур Угуевлул, Заурбек Сидаковлул ва Аьбдулрашид Садулаевлул цал уттигу ккаккан бувна цивппа хьхьичIунми бушиву.
70 кило кIушиврул думиннал матчрай жула лаккучу Ибрагьим Ибрагьимовгу Давид Баевлущал лачIун увккун ххув хьуна.
АцIийла хьуна биюлтрал данди буккаву, мяйра талатавриву ххув хьуна дагъусттанлувтал.
Ххув хьуми барча буллалисса шадлугъ хьуна Каспийскалийсса ресторандалуву. Ххув хьусса командалун дуллуна 10 миллион къуруш премиялун ва «Дусшиврул Кубок». Аланиянал командалунгу буллуна 5 миллион къуруш. Вай барча буллай, Оьмар Муртузялиевлул кIицI лавгуна, уттисса бяст-ччаллий бахшиширттал фонд хъун дувантIишиву. Ва цувагу бахшиш дакъа къаливчIуна: Хасавюртуллал райондалул Адильотар шяраваллил вакилтурал меценатнан, щинал мугьалтту бувксса ппурттуву бувсса кумаграхлу барчаллагьран къуттакьяпагу, варсигу пишкаш бувна. Укуннасса бахшишру дуллуна Аьрасатнал лачIун буккултрал Федерациялул (ФСБР) цалчинма вице-президент Арсен Фадзаевлунгу.
Ххув хьусса ацIуннавух жула Ибрагьим, Къяннал шяравасса багьадура, Европанал чемпион ушиврия пахрулий, дакIнийхтуну барчагу уллай, цIу-цIусса ххувшавуртту чIа тIий буру ванангу.
ПатIимат Рамазанова
