Ниттил мазурдил кьинилун хасну, Лакрал райондалул бакIчи Зураб Куччаевлул сипталийну, дуклаки оьрчIал дянив хьунни лакрал шаэр, чичу МахIаммад-Загьид Аминовлул творчествалун хас дурсса конкурсру: ца «Живая классика», цагу – дакIних пасихIну шеърирду буккаврилсса.
Шиккува кIицI бан, КIулшиву дулаврил министерствалул ккаккан бувну буссар щала билаятрай ва конкурс дуллан оьрус мазрай, оьруснал чичултрал произведениярттан хас дурну. Зураб Куччаевлул тIалавшиндарайн бувну, лакрал литературалул ирс ябаву ва машгьур баву мурадрай, райондалий ва конкурс дуллан тIий бур лакку мазрай, цурдагу лакрал чичултрал творчествалун хас дурну.
«МахIаммад-Загьид Аминов машгьур хьуну ур шеърилугърал усттар хIисаврай, илданун ххира хьуну ур буттал улклухасса, ппухълуннал тарихрахасса ччаврил вибувцIусса, пасихIсса ва бюххансса шеърирдайну. Ганал творчество тIалавну дур хIакьинугу.
Мунийн бувну, «Живая классика» конкурс яргсса ишну хьуссар райондалул магьирлугърал оьрмулуву, цилгу кабакьу бантIиссар лакрал литературалул ирс ябаврицIун, чантI учин бантIиссар дуклаки оьрчIал дакIурдиву лакрал классикалухсса хIурмат, итххяххан бантIиссар мунихсса гъира», – увкунни Зураб Куччаевлул.
Конкурс дуссия 5-11-ми классирттал дуклаки оьрчIал дянив. Ваний гьуртту хьуссар 25 оьрчI. Гьурттучитуран ххаллилну кIулну дия Аминовлул творчество, авторнал асарду аьч банну ккалай бия произведенияртту.
Ххув хьуминнан бахшишру дуллунни Хъаннил байрандалун хас дурсса шадлугърай. Зураб Куччаевлул буллунни райондалул администрациялул чулухасса дипломру ва шаэрнал душнил, филологиялул элмурдал кандидат Ххазина Аминовал чулухасса ссайгъатру.
Ххув хьуминнал цIарду 5-8-ми классирттал дянив:
1-мур кIану – Ибрагьимов Кьурбан (Щардал школа, 5-мур класс);
2-мур кIану – МахIаммадова Амина (Гъумучиял школа, 6-мур класс);
2-мур кIану – Барххулаева Аматулла( Ккурккуллал школа, 8-мур класс);
2-мур кIану – Ванатиева Жамиля, (Хьурттал школа, 7-мур класс);
2-мур кIану – Шяпиева Сара, (ЧIурттащиял школа, 6-мур класс);
2-мур кIану – Сулайманова Раяна, (ШавкIуллал школа, 6-мур класс);
2 -мур кIану – Исупова Замира (Кьубиял школа, 7-мур класс).
9-11 классирттал дянив:
2-мур кIану – ХIасанов Аьбдулаьзиз (Гъумучиял школа, 9-мур класс);
1-мур кIану – Кьурбанова КьурбанпатIимат (Щардал школа, 11-мур класс);
1-мур кIану – ХIажиева Султанат (Кьубиял школа, 11-мур класс);
2-мур кIану – Сагидова ХIалимат (Кьубиял школа, 10-мур класс).
Зулайхат Тахакьаева
