Лаккуй хъунисса марххалттаща къатри, ххуллурду ва ризкьи ххассал бувансса давуртту дуллайнма бур вай гьантрайгу. Шяраваллил хозяйствалул ва бакIлахърулул министр Шамил Рамазановлул тапшур бувну, Ккуллал райондалий ци тагьар дурив, цукунсса кумаг аьркинну бурив ккаккан бивунни министрнал хъиривчу Шамил Жамалов ва Ризкьилулсса буллалисса управлениялул каялувчи Светозар Оьмаров.
Райондалул хъунаманал бурж чIумуйну бартбигьлагьисса Ажуб ХIусмановлущал совещание дурну, бивсса зараллал хIисав ларсун, Шамил Жамаловлул маслихIат бунни райондалий чрезвычайная ситуация (ЧП) баян буван. ЧП баян бувсса чIумал, тIабиаьтрал биян бувсса зараллащалсса талатаву гужлан дувансса шартIругу, сантгу дикIайну тIий ка-кумаг тIалав бувангу.
ТIабиаьтрал гужну рирщуну дур учин бучIир фермертурал хозяйствардайх. Ларгсса нюжмардийсса хIасиллайн бувну, райондалий ливтIуну бур 250 ризкьи, вайннувату 170 лухIи ризкьи, 40 тта ва вайкссава дучри. Вай цифрарду бюхъайссар тания махъ баххана хьуну бикIангу, ветеринар службарду хъирив бавцIуну, цумур шяраву, цумур фермалий ци тагьар дурив кIул буллай, бан шаймур кумаг буллай бур. Кумаграх мюхтажну дусса дур 2800 метралул лахънийсса фермарду, вай залунсса марххалтталу лирчIун дусса дур, ххуллу буккангу захIмат-жапану бусса бур. 20 километралул манзилданийсса ххуллу буккангу бигьасса иш бакъар. ЦIанасса ппурттуву райондалул администрациялул ва давриха зузи дурну дур кIусса техника. Кказит буккултрачIан бияннин бюхъайссар ххуллу буккангу.
Шяраваллил хозяйствалул министерствалул сипталийну ризкьичитурачIан 40 тонна ххаллал диян дуван бакIрайн лавсунни. Инттухунмай лазуннарал кIюла бувксса ризкьичитуран, ятту-гъаттара ккашил къиялуща ххассал бувансса чаран-кумагри вагу.
Хъуни марххалтту цивппалу къабикIан, ялун бивунни цамургу бала: марххалттал хьюму-ччюму дурсса лахIунтту дуцлай, къатрал ялун ва ххуллурдайн лекьан нанисса нигьачIисса тагьар. Ккуллал шяраву укунсса нигьачIин дусса кIанттурдайсса къатрава халкь бизан буван маслихIат бунни Шамил Жамаловлул. Ванал кIицI лавгунни, хьхьичI ххуттай агьалинал мюхчаншиву дуруччаву дикIан аьркиншиву ва лябуккулий му ишираха зунтIишиву.
Цуксса захIмат-жапасса тагьар духьурчагу, республикалул ва райондалул властирдал кабакьаврийну ва цала хIарачатрайну марххалттал гьужумраща ххассал хьунсса кьастирай ва хIарачатрай бур райондалул жямат. ХIарачат буллай вардишсса агьлурхха. БувантIиссар ва ххуллухьгу. ТIабиаьтралгу, Аллагьу Тааьланалгу кабакьинхьуви.
