Сентябрьданул 21-нний МахIачкъалалив ДР-лул Транспортрал ва ххуллурдал хозяйствалул министерствалий хьунни ведомствалущал хIала-гьурттусса идарарттал вакилталгу гьуртту хьусса гьарта-гьарзасса пресс-конференция.

Ва хас дурну дия ххуллурдайсса мюхчаншиву дуруччаву мурадрай дурсса, хIукуматрал ва бизнесрал заллухъруннащал цачIуну зунсса кьутIирдан.
Шикку гьуртту хьунни ДР-лул транспортрал ва ххуллурдал хозяйствалул министр Жамбулат ХIажиев, ДР-лул «ЦОДД» ГКУ-лул каялувчи Наби ­Аьлиев, Дагъусттаннал МВД-лул Гоставтоинспекциялул управлениялул хъунамаТарлан Герейханов, ЦАФАП-рал хъунама МахIаммад Байзанов, Дагъусттаннал СМИ-рдал вакилтал, блогертал ва жяматийсса ишккаккулт.
Жамбулат ХIажиевлул бувсунни Дагъусттаннал Транспортрал министерствалул иширайну зузи дурну душиву машинарттал ххуллурдай суратру ва видеортту ласлансса комплексру бишинсса кьутIирду. Цалчинсса кьутIи дурну дур 2023 шинал «Урбантех ТТ» ООО-лущал 200 видеокомплекс бишинсса. Ва проектрайн бувнусса инвестициялул лагру дур 1,3 млрд арцунсса.
КIилчинмур кьутIи дурну дур 2024 шинал «СКОБЖ» ООО-лущал. Инвестициялул лагру дур 1,44 млрд арцунсса. КьутIилул лагрулий бишин ккаккан бувсса 300 видеокомплексрава бивхьуну бур 200. ЛивчIми видеокомплексру шинал ахирданийнин бишин най бур.
Министрнал кIицI лавгунни, концессионный кьутIирдал агьаммур мурад ххуллурдайсса мюхчаншиву дуруччаву ва бюджетравун арцу дачин даву хъанахъишиву. Видеокомплексру дишаву ва миннуха аякьа даву ва дакьин даву концессионертурал бурж хъанахъишиву.
Гьашинусса шинал сентябрьданул 21-ннийнин Дагъусттаннал региондалийсса ххуллурдай бивхьуну бур 767 фотовидеофиксациялул комплекс, миннува 750 стационар ва 13 мобильный, 4 занази журалул бур.
Комплексру бишинсса кIанттурду язи бугьлай бур аварияртту чIяруну хъанахъисса ххуллурду хIисавравун лавсун, Госавтоинспекциялул ва муниципал образованиярттащал маслихIат ккавккун.
Видеофиксациялул комплексру бихьлай байбивхьуния шинмай, республикалий хъанай диркIсса ДТП-рду 7,8 % чан хьуну дур. Мукунна яларай хьуну дур ххуллурдай апатIру хьуну ливтIуминнал сияхIгу.
Мяйжаннугу комплексру бихьлай байбивхьуния шинмай, ххуллурдайсса низам дуруччаву бакъассагу, шикку сакин хьусса арцух цIусса ххуллурду буллансса ва зия хьуми бакьин буллансса даражагу ххишала хъанай бур.
ГИБДД-лул управлениялул вакил Тарлан Герейхановлул кIицI лавгуна, Дагъусттаннал Транспортрал министерствалущал вай масъалартту дузрай буккан баврил хIакъиравусса цIакьсса дахIаву душиву.
Пресс-конференциялий ихтилатирттал лях-карах журналистътурал суаллахьхьун балжисса жавабру дуллай, цаппара масъаларттал хIакъираву маслихIатру ккаклай ия цува министр.