Октябрьданул шамилчинмур алхIаткьини Аьрасатнаву кIицI лагай Ххуллурду байсса пишакартурал кьини. Ххуллурдай буллалисса захIмат, микку дуллалисса давуртту цинявнналагу яруннил хьхьичI дур. 

Гьай-гьай, цинявннанвагу лапва ххуйну кIулли, цуксса агьамсса бияла буссарив ххуллурдахь. Цуксса ххуллурдал ахIвал ххуйну бурив, мукссава ххуйну бикIай ми ххуллурдал лагма-ялттусса кIанттурдал ахIвалгу. Цуксса ххуйну зий бурив ххуллурдал пишакартал, мукссава анаварну ларай хъанай дур шагьрурдал, щархъал шартIругу. Ххуллурду ххуйну буссакссса, ми ххуллурдайх заназиминнал гьавасгу, гъирагу ххишаласса бикIай.

Ххуллурдал пишакарнал кьинилуцIунгу бавхIуну, бусан ччай ура Дагъусттаннал ххуллурду бувай пишакартурал кьюкьлуву хъинну лайкьсса кIану бугьлагьисса, ЦIуссалакрал райондалиясса ххаллилсса лаккучу, Аммал арс Жалалов ­Оьмардуя.
Къуртал бувну Воронежуллал институтрал ххуллурдал факультетгу, ва зун ивкIун цала пишалул идаралий. Оьмардул ччясса мутталий ккаккан бувну бур цува му давриву гьарца чулуха итххявхсса пишакар ушиву. Сайки 30 шинай Оьмар ЦIуссалакрал райондалул Ххуллурдал управлениялул хъунаману зий уссия. Яла махъату ва хьунни ххуллурду байсса «Вымпел» тIисса идаралул каялувчигу. Амма, шикку зий урача куну, райондалул ххуллурдал управлениягу ванал къакьабивтунни. Вай кIивагу идаралий зузисса цинявгу шиннардий Оьмардул ккаккан бунни цува тIалавшин дусса, за кIулсса ва тIайламур ччисса каялувчи ушиву, ккаккан бунни цала бюхъу-бажар. Цалчинма-цалчингу, ванал ккаккан бунни цуксса хъуннасса къулагъас дайсса уссарив цала зузалтрах, гай цума цукун урив, щин ци аьркинну дурив, мудангу аякьалий ацIайсса ушиву.

 
Оьмардул хIарачатрайну, ЦIуссалакрал райондалул Ххуллурдал управлениялий дикIу, «Вымпел» идаралий бикIу сакин хьуну бур ччими ххуллурду буван шайсса коллективрду, дур диялсса техника, бур асфальт байсса кIива завод. ВаначIа мудангу дикIай аьркинссаксса луртан ххуллурдай ишла дайсса материаллал. Мунийн бувну, Оьмардул идарарттаща дуван бюхълай бур га яла захIматмур, яла тIалавшинна хъуннамур давугу, хIатта кIива-шанма объектрай цалархIал даву дачин дуллай. Ларгсса шиннардий ­Оьмардул каялувшиврийну дурссар ттуршрахъул километрарду ххуллурдал ЦIуссалакрал, Буйнакскаллал, Хасавюртуллал, Бабаюртуллал, Казбековуллал ва цаймигу Дагъусттаннал районнай, мукунма МахIачкъала, Хасавюрт ва Къизилюрт шагьрурдай. Ххуллурду бакъасса, ­Оьмардул бувунни кIива хъунисса школа, ца – Къаякантуллал, цагу – ЦIуссалакрал райондалий. Транспортрал ва ххуллурдал министерствалул чулуха ванан цимилгу буллуссар Барчаллагьрал чагъарду, дуллуссар ХIурматрал грамотартту. Мува куццуй, Оьмардун уттигъанну дуллунни Дагъусттан Республикалул бакIчинал чулухасса ХIурматрал грамотагу. Ванал хIалал дурссар «Дагъусттаннал лайкь хьусса строитель» тIисса цIа. Оьмар инсаннал чIарав ацIан кIулсса, аьркиннан кумаг бан хIадурсса, дакI чумартсса унутIий, хъинну хIурматрай ур гьарца кIанттай – райондалийгу, кьатIувгу.
Жула учай, адаминал цала оьрмулуву аьркинссар къатта-къушгу бан, арсгу хъуна ан, мурхьгу бугьан куну. Оьмардул ххаллилсса къатта-къуш бур ЦIуссалакрал райондалийсса ЦIуссаккуллал шяраву бувну, гай къатрал нуз-кьунттивгу муданна кунна тIиртIуну дикIай цума-цаннангу. Хъамал бакъасса чIунгу гай къатраву нажагь дакъа къашай. Му бакъассагу, буттал шяраву – Хъусрал ЧIаравгу дунни ххаллилсса къатри. Цала кулпат Майящал архIал ванал чивун буккан бунни шама арс ва ца душ. Миннавасса ца арсгу, къуртал бувну институтгу, зий ур цIана Дагъусттаннал «Автодорданий», цала буттал пиша язи бувгьуну. Мурхьругу Оьмардул чансса бувгьуну бакъар цала оьрмулий. Щаллусса багъ бувгьунни шаппа, цайми-цайми кIанттурдай бувгьуми къахIисавну.
Амма Оьмар дурмуний гьашиву дайма акъар. Ванал цалва хьхьичI бивхьусса масъалартту уттигу чIявур. Щак бакъар, Оьмар бакIчисса идарарттал вания тинмайгу буллалисса ххуллурду, иш багьарча, школардугу, цила чIумуйгу, лахъсса даражалийгу баншиврийн.
ЧIа чинну Оьмардун цIакьсса цIуллу-сагъшиву, кулпатравусса барачат, хIакьсса ва вихшала дишинсса гьалмахтал!
Зиябуттин ХIажимирзаев,
Дагъусттаннал лайкь хьусса строитель