Цалчинмур ЦIувкIуллал шяраваллил жяматрал дакIру къума лаган дансса кьурчIишиву уттигу хьунни. Ларгсса нюжмардий ахиратрал ххуллийн тIайла увккунни СВО-лий чувшиврий жан кьурван дурсса Кьурбаннул арс Сулайманов Марат.

Ва Каспийскалий яхъа­най уссия. Маратлул ппу ЦIувкI­ратуссар, зий ивкIссар Каспийскалий Механикалул заводрай, лахьхьин бай комбинатрал хъунаману. Яла Каспийск шагьрулул КIулшиву дулаврил управлениялул методистну зий уссия, кIулшиву дулаврил отличникнал цIанингу лайкь хьуссия. Ппу, аьпа биву, сагъну акъассар. Ниттин бугьарасса оьрмулий арснал ва хажалат духIлан багьунни. Нину АхIмадлул душ ПатIимат Хъусращатуссар. Вагу чIярусса шиннардий шагьрулул поликлиникалий медсестрану зий буссия.
Маратлул Каспийскалий 2-мур школа къуртал бувну бур. Архмур Востокрай аьралий буржгу бартбивгьуну, Шяраваллил хозяйствалул университетравун дуклан увххун ур. Амма ванан цала кIану шяраваллил хозяйствалул даврий чIалай къабивкIун бур. Армиялий МЧС-рал аьралуннаву къуллугъ буллалисса Марат сержантнал чиндалуву зана хьуну ур, спорт ххирасса ва авиациялул кьюкьлуву ххассал бувуну зун ивкIун ур МахIачкъалаллал РПСБ-лий. 2024-ку шинал майрай контракт цIакь дурну, СВО-лийн лавгун ур. Донецкалий къизгъинсса талатавриву аьралий гьалмахтал ххассал буллай жан дуллуну дур. Сержант Марат Сулайманов дунияллия лавгун махъ Чувшиврул орден дулун ккаккан увну ур.Маратлул кьура шинавусса арсгу, ацIния ряхра ва ряхра шинавусса душругу бур. КIулцириннан Марат дакIний ливчIун ур тяхъасса, хъярчру ххирасса, дустал, гьалмахтал лагма лаган бан кIулсса, дусшиву дугьан кIулсса инсанну.

«Ватандалухсса ччаврил, адаминал баймур буван гьан аьркинссара, нацизм ххартI дуван аьркинссар тIий ия. Инсантал ххассалбувул пиша язи бувгьуна, оьрму, дустал ххирасса ия. Аьрайгу дустал ххассал буллай жан дуллуну дур, ххассалбуву ххассалбувуну лавгунни дунияллиягу», – тIий дур Маратлул щарнил нину ПатIимат.
Маратлул дустал, гьалмахтал, даврил уртакьтал, ца зумату кунма, дакIнил оьвкуну Ватандалул мурадру буруччин лавгсса талаталар, чувшиврул ва сисаврил эбратри, агьалинан хъинбала, ххуймур буван чялиш уккай­сса ия тIий бур.
«Ххишала акъа дакI-аьмал хъинсса инсан уссия. Лас хIисаврайгу, ппу хIисаврайгу хъинмур бакъа учин къахьунссар, аякьа дусса ия. Ххирая аьрххилий занан, цIу-цIусса кIанттурду ххал буллан. Ххирая спорт, ххирая ссав, ххирая инсантал ххассал буллан, оьрмулул мяъна ва давриву чIалай ия. Ссавних эшкьи хьусса инсан ия, мудан парашютрай тIанкI дуван гъира буну икIайва, диялсса тIанкIругу дурссар, душнищалгума парашютрай тIанкI увкуссар. На уттигу хьумур бувчIин, лаласун бувасса кунма, цIан ттуруллал бувгьусса кунмасса асардай бура, дакIнин утлангу захIматну бур», – тIий бур Мадина.
Ва, цилва кабинетгу тIивтIуну, Каспийскалий логопедну зий бур. Мадинан утти арснан ва душвавран буттал кIанугу бугьан багьантIиссар. ЯхI къабувнугу пайда бакъассар.
ПатIимат Рамазанова