ЦIуссалакрал райондалул администрациялул къатраву хьунни райондалул бакIчинал хъиривчу Султан ХIамзатовлул каялувшиндаралусса даврил масъалартту ххал бигьлагьисса ирглийсса батIаву.

Шикку гьуртту хьунни райондалул бакIчинал хъиривчутал, администрациялул структурардал, райондалул идарарттал каялувчитал.
Ва кьинисса батIаврий ххал бивгьунни агьалинал оьрмулул шартIру ва райондалул ахIвал къулай баву мурадрайсса масъалартту. Ца яла цIурювкьумур бия ЖКХ-лул сфералувусса масъала. ЦIухху-бусу бунни Ямансу шяравусса щинал тагьардания. Вайннуха зузисса хасъсса пишакартурал бувсунни ва даву ссайн дирну дуссарив.

БатIаврий агьамсса къулагъасрайн лавсунни муниципалитетрал экономика хьхьичIуннай даврин хас бувсса масъаларттугу.
Совещаниялий кIицI лавгсса цинявппагу масъаларттал хIакъираву ккавккунни хасъсса маслихIатру.

Мукунма ххал бивгьунни административ ва юридий масъаларттугу. ЛичIисса къулагъасрайн лавсунни къатрал документирттал хIакъиравусса масъалартту. КIицI лавгунни вай процедурартту анавар дуккан дансса ххуллу-чаранну.

Гьаз бунни социал сфералул ва мюхчаншиву дуруччаврил масъалартту. Бувсунни ссуттилсса призыв дайдихьлахьишиву ва контрактрай аьралуннаву къуллугъ бан ччиминнансса хIаллихшиннардая.
Совещаниялул даврил хIасиллу дуллай, Султан ХIамзатовлул чурчIав дунни цинявппагу ва кьини гьаз бувсса масъалартту дузрайн буккан баврил ялув бацIан аьркиншиврий.