Лакрал райондалул бакIчи Зураб Куччаевлул оьвкуну, алхIаткьини, Лаккуйн даврил аьрххилий увкIунни ДР-лул экономикалул министр ХIажи Султанов цала хъиривчу Шамил Аммаевлущал.

Райондалул бакIчинал хъиривчутал ва идарарттал каялувчиталгу гьурттусса хьунабакьаврий ххал бивгьунни райондалул социал-экономика хьхьичIуннай даврийн багьайсса суаллу.

ХьхьичIххуттай ккавккунни зузи кIантту хIасул баврийн, ишбажаранчишиврун кабакьу баврийн, туризмалул потенциал ишла баврийн, инвестицияртту кIункIу дансса ххуллурду лакъяврийн багьайсса суаллу.
– ХIакьинусса ихтилат хьунни агьамсса. Лакрал райондалий хьхьичIуннай хьунсса потенциал хъунмасса бур, жунма багьлай бур му ишла бансса шартIру ­дузал дан», – увку­нни ХIажи ­Султановлул.

Зураб Куччаевлул барча­ллагь увкунни министрнахь райондалун кумаг бан хIа­дурну ушиврухлу. «Жунма аьркинну бур республикалул министерствалул чулухасса кумаг. ХIакьину ххал бивгьусса масъалартту гьануну лавсун зун бюхъантIий бур жущава гихунмай. Жула мурад район ччясса мутталий хьхьичIуннай хъанай дайдишавур. ДакI дарцIуну ура цачIу жущава вай хьхьичI бивхьусса мурадру чулийн буккан бан бюхъантIишиврийн», – увкунни ванал.

Зулайхат Тахакьаева