ЦIуссалакрал райондалий­ шадлугърал даражалий тIиртIунни ттизаманнул оборудованиялущалсса цIусса хъаннил консультация. Хъаннин медициналул кумаг баврил даву, хаснува шяраваллил кIанттурдай, Дагъусттаннал ЦIуллу-сагъшиву дуруччаврил министерствалул даврил ца агьамсса бутIа бур.

Мероприятие тIитIлай ихтилат бунни ЦIуссалакрал райондалул бакIчинан кIанайсса Султан ХIамзатовлул. Ванал бувсунни хъаннил консультациялул къатри «Кулпат» нацпроектрал лагрулий дуршиву.
– ХIакьину жува ва идара тIитIлатIаврилгу исват буллай бур федерал властьрал кабакьу гьарица шяравун, гьарица кулпатрачIан биллай бушиву, жула хъаннил, ниттихъал цIуллу-сагъшиврул масъала къулагъасрайн лавсун бувшиву, – увкунни ванал.
Мероприятиялий гьуртту хьунни бусравсса хъамал: Аьрасатнал ПаччахIлугърал Думалул депутат МахIаммад Валихов, Дагъусттаннал Халкьуннал Мажлисрал комитетрал председатель Артур Исрапилов, ЦIуллу-сагъшиву дуруччаврил министрнан кIанайсса Аьлиоьмар АхIмадов, ванал хъиривчу Мямма Алхулаев.
– Хъаннил цIуллушиву – му талихI бусса, цIакьсса кулпатрал гьанур. ХIакьину жува тIитIлатIисса хъаннил консультация дузалну дуссар гьарица аьркинсса ттизаманнул оборудованиялул. ЧIявусса халкь бусса райондалун ва хъуннасса хIаллихшиннар. Райондалул жямат ва тIитIиннин ялугьлай хъунмасса хIалъя, – увкунни Аьли­оьмар АхIмадовлул. Дагъусттаннал ЦIуллу-сагъшиву дуруччаврил министерствалул «Кулпат» нацпроектрал лагрулий тIитIлай бур ххишаласса хъаннил консультацияртту. 2030-ку шинайннин республикалий укунсса 27 идара тIитIинсса пикри бур. Цалчин ми тIитIин ккаккан дурсса районнавух дур Сергокъалаллал, ЦIуссалакрал, Къайтагъуллал районну. Консультацияртту тIитIаврийну оьрчI бан нанисса хъаннил цIуллу-сагъшиврул ялув бацIан бюхълай бур ми цивппа яхьусса кIанттурдай.

Андриана Аьбдуллаева