Октябрьданул 1-нний Дагъусттаннал бакIчинал чIумуйсса кIанайма Федор Щукин гьуртту хьунни Халкьуннал Мажлисрал 1-мур сессиялий. Дагъусттаннал цIусса парламентраву ур 90 депутат, хьхьичIра диркIсса партияртту сахлану дур. Республикалул чIявуми инсантурал чIурду буллуну бур «Единая Россия» партиялухлу.ДР-лул Избиркомрал бакIчи МахIаммад Дибировлул тIимунийну, бувчIавурттал кампания хьуну дур зако­нодательствалуцIун даркьуну, демократиялул принципирттал лагрулий ва цалий дарцIусса жяматийсса ва политикийсса тагьарданий.
Федор Щукиннул 9-мур созыврал ПаччахIлугърал Думалул ва 8-мур созыврал ДР-лул Халкьуннал Мажлисрал депутатътурахь барча дунни бувчIавурттайсса ххувшаву.

«Жула хъунмур мурад – республикалул ялапарлувтурал вихшала тIайла давур. Депутатътурал даву инсантурал бунияласса масъаларттачIан гъан дурсса дикIан аьркинссар. Мукун баншиврул аьркинссар ялапарлувтуращал хьунабакьлан, ххал дигьлан миннал лабизавуртту, кIулну дикIан аьркинссар шагьрурдайсса ва шяраваллавусса тагьар», – увкунни Щукиннул.
Ванал тIимунийну, личIи­нурасса къулагъас дикIан аьркинссар СВО-лул гьурттучитурах ва миннал кулпатирттах.
Сессиялий региондалул каялувчинал тапшур бунни Дагъусттаннал парламентрал председательнал къуллугърайнсса бувчIавурттаву Заур Аскандаровлухлу чIурду булун. ЧIурду булаврил хIасиллайну увчIунни Заур Аскандаров.
«Жула давриву яла хъунмур масъала – инсанталли, миннащалсса давур. Жухьхьунна ихтияр дуллуну дур парламентраву миннал мурадру щаллу буллан, мунийн бувну, жура аьркинссар жуйрасса вихшала цIакь дуван бунияласса давурттайну», – увкунни парламентрал председательнал.
Федор Щукиннул Заур Аскандаровлухь барча дунни цIунилгу гава къуллугърайнсса увчIаву.
«Жула хьхьичI бур чIявусса аьмсса масъалартту. Мунияту хъуннасса агьамшиву дуссар Халкьуннал Мажлисрал кIанттул цилакаялувшиврул ва биттуршиндарал властьрал органнащал хIала-гьурттушиву душаврил. Инсантурал оьрмулуву хIакьсса дахханашивуртту шаву –жула даврил хъунмур дуцинни», – увкунни Федор Щукиннул. Депутатътуран чIа увкунни тIайлабацIуртту.
ХI. Аьдилов