Щалагу билаятрай ноябрьданул 4-нний кIицI лагайсса Аьрасатнал Халкьуннал цашиврул кьинилун хас дурсса мероприятияртту хьунни Ккуллал райондалул школардай, Культуралул къатраву.
ЧIяйннал Магьирлугърал къатрал хъунмур СалихIат Алхасовал каялувшиндаралу дунни Аьрасатнал Халкьуннал цашиврул кьинилун хас дурсса мероприятие. Шикку гьуртту хьунни дуклаки оьрчIру. Вайннал балжину бувсунни байрандалул агьамшиврия.
Магьирлугърал къатраву дуллалисса цинярда мероприятиярттавух чялишсса гьурттушинна дайсса ПатIимат СутIаевал ва ПатIимат Аьйдаевал гьарта-гьарзану бувсунни байрандалул тарихрая ва му сакин шаврия. ДакIнин дирчунни Хъун дяъвилий Ватан дуручлай бивкIсса жула пухълуннал дурсса къучагъшивуртту ва хIакьинусса кьини Украиннал аьрщарай нанисса хасъсса аьралий операциялий чувшивуртту ккаккан дуллалисса ва аьпалул хьусса жула жагьилтал. Байрандалун хасъсса шеърирду бувккунни Аьбдул ТIугуевлул ва Ибрагьимхалил СутIаевлул.
КIицI лаганну, школардай, культуралул идарарттай нюжмардул мутталий най диркIшиву Халкьуннал цашиврул кьинилун хас дурсса мероприятияртту, классный часру.
Лажин хIадур дурссар
Имара Саидовал
