Жула заманнай балайчитал чIявур, амма чанни вайннаву халкьуннал балайрду ххирами, вай щаллу буллалими. Яла-яла жагьилминнаву. Жула лакрал гьунар бусса балайчи ПатIимат Гъавзиева бур халкьуннал балайрду ххирасса нажагьминнавасса ца.

Халкьуннал балайрду цинма ххирашивруцIун, ПатIимат бур соцсетирдавусса цилла страничкардай ми машгьур буллай, цайминнангу ххира хьун буллай. Ванил балайрду савав хьуну лакку маз лахьлансса гъира багьссагу, «чаргудай» цирив ва «лярдачув» цурив кIул буван ччиссагу буссар къачансса.

Бувну бур ПатIимат 1992-ку шинал Белгородуллал областьрай Ккуллал райондалийсса Хъювхъиял шяравасса МахIаммадлул ва ЦIуссаккуллал шяравасса Сиясатлул кулпатраву.1997-ку шинал вайннал кулпат зана хьуну бур Дагъусттаннайн. ПатIиматгу цалчинмур классравун лавгун бур Новостройрайсса Шушиннал шяраву. Му диркIун дур ва шяраву дахьва школа тIивтIусса шин. Ххюлчинмур классрава тиннайсса дуккаву душнил дурну дур Новостройрайсса ЦIуссалакрал шяраву. УрчIулчинмур классрая тинмай школа къуртал баннин дуклай бивкIун бур ЦIуссаккуллал шяраву. ПатIиматлул ниттил, аьпа биву, Сиясат Башировнал, цал Хасавюртуллал педучилище, яла Дагъусттаннал паччахIлугърал педагогический институтгу къуртал бувну, бакIрайва байбихьулул школалий, яла тарихрал дарсру дихьлай, цилва оьрмулул мукьцIалунния лирчусса шинну педагогнал пишалун харж дурссар, цIусса миналий цIусса оьрму дузал бавривугу хъунмасса бутIа бивхьуссар. Цила душнингу ванин учительнал пиша яла лайкьмурну чIалай бивкIун бур. Мукун, 2009-ку шинал школагу къуртал бувну, ПатIимат бувххун бур Дагъусттаннал паччахIлугърал пединститутрал художественно-графический факультетрайн. Дуклай бунува, зийгу бивкIун бур: институтравува живописьрал кафедралий хъунаманал хъиривмурну, лаборантну ва школалий рисованиялул дарсру дихьлай. Студентсса шиннардий ПатIимат, личIи-личIисса фестиваллай, конкурсирттай, форумирттай гьуртту хъанай, чIявусса кIанттурдайн бивну бур. Балай увкуну, хьхьичIунсса кIанттурду бугьлай, бахшиширттан лайкь шайсса бивкIун бур. ПатIимат гай шиннардий мукунма зий бивкIун бур Новостройрайсса, ХIабибат Буттаевал каялувшиндаралусса культуралул къатлувугу.

2014-ку шинал ПатIимат щар хьуну бур. Ванил лас, Ккуллал шяравасса ЦIаххай МахIаммадов, органнай зий ур. Вайннал дянив бур шанма оьрчI. ПатIиматлул, сахIналий МахIаммадовхъул чIявур Гъавзиевхъулнияр куну, цуппагу, цила тамашачиталгу аьдатсса цилламур фамилияра дитан пикри бувну бур.
Гьарца инсаннал оьрмулуву дучIайхьунссар ххину-чанну захIматсса чIуннугу, яла-яларив – творчествалул инсантурал. ПатIиматлул оьрмулувугу мукунна. ХъатIайн-хъиншивурттайн оьвтIутIиссаксса, ваниву чан хъанай бивкIун бур балайлухсса гъира, лешлай бивкIун бур творчествалул гьавас. Творчество коммерциялийн, къаматериалмур материалмунийн дуккаву ванин даши къадизлай диркIун дур, цуппа, творчествалул единица хIисаврай, му сфералул ссуссукьу буллалисса кунмасса асар хъанай бивкIун бур. Ялагу, жагьилсса, дакI кIукIлусса, цихрасса ххишаласса къулагъас къаччисса, кулисардахсса оьрмулийн цуппа къахIадуршивугу бувчIусса душнин аьлагъужасса, чIяву инсантал бусса кIанттурдугу, миккунсса аьрххирдугу ччай къабивкIун бур. Циява цуппа чIявуну къарязину бикIайсса душниву цила гьунарданийнсса вихшалагу, циваннив, хьхьара хъанай диркIун дур. Ялагу, ласкъатлул хьусса душнин сахIнанияр кулпатгу, ичIаллил къайгъурдугу хьхьичIунну бивкIун бур. Мадарасса хIал хьуну бур ПатIиматлул укун, шаппах, балайгу так цихунма цуппа тIий.

Творчество кьадиртссаксса хIаллай ПатIимат косметологиялухунгу багьну бур, ва чулуха тIалавнугу бивкIун бур, амма дакI ва пишалухух къаларгун дур, махъуннай творчествалувунна кIункIу тIий диркIун дур.
Вай къабигьасса асардал ялун дирну дур хъуннасса къумашивугу, оьрмулул 63 шинаву, ванияр ца шинал хьхьичI, аьпалул хьуну дур ванил нину. Цила оьрмулуву агьамсса кIану бугьлай диркIсса, дахьра лахьхьу чIарав диркIсса ниттил кIану бачIва шаврилгу ванийн хъунмасса асар биян бувну бур, муния махъ ванин, балай учавриву цири, оьрмулуву цивувагума мяъна-мурад чан хьусса асар бивкIун бур. Сиясат бивкIун бур хъинну сивсусса, яргсса, личIи-личIисса сиптарду бартдигьлагьисса, хъит-шит бусса, цайминнавунгума гуж бутлатисса.
Ва хIалданийсса ПатIиматлул дакI дувансса, бивзун, гихунмай бачинсса махъру лявкъуну бур ванищал гъан-маччашивугу дусса, дусшивугу дусса, жунмагу кIулсса, Лакрал радиолий зузисса, оьрмулуву цинмагу къачансса ккавк­сса Оксана Султановал. Му чIумал ПатIиматлул шаппа, дирхьуну хьхьичI телефонгу, щаллу бувну бур цинма хъинну ххирасса Лариса ХIажиевал балай, инстаграмраву бивхьуну, му дунияллул лагма бувккун бур. Я цилва чIунил, я вокалданул, я видеолул даражалий къабавцIуну ларсъсса ролик дурккун махъ, ваничIан ца хъамитайпалул чивчуну бур, агана винма ччан бикIарчан лакрал халкьуннал балайлул запись дуван, на хIадурну бура му ишираву шайсса чIарав бацIаву дуван тIий. Му хъамитайпагу бивкIун бур ЧIарттал шяравасса, Сургут шагьрулий ялапар хъанахъисса Эльмира Ибрагьимова.

 Тиха Дагъусттаннайн бувкIсса чIумал Эльмира хьунабавкьуну бур ПатIиматлущал, лавгун архIал студиялийн, чивчуну бур цалчинсса балай. Муния махъ – кIилчинмур, шамилчинмур, мукьилчинмур… Цуппа медициналуву зузисса Эльмира чIявучин кIулссар миллатрал культуралул кьадру бусса, творчествалул инсантурал чIарав бацIлацIисса, буттал шяравалу, Лакку билаят цIу лаган баврил ххуллий личIи-личIисса давуртту дуллалисса хьхьичIунсса инсанну. Эльмирагу буслай бур ПатIиматлул творчествалущал цуппа кIул хьусса куц:
– Тийх, Ухссавний, тарихийсса ватандалия архний, буттал улклух ляличIиссава мякь бикIай. Ца хьхьуну, ттула душ бувсса кьини кIицI лаглай, жул кулпат шаппа щябивкIсса чIумал, соцсетьраву итталун дагьуна ПатIиматлул балайлул видео. Му балай жул кулпатран хъинну асар хьуна. Асар хьуна му балай щаллу буллалаврил формат цурдагу. Гьунар бусса инсан ккавккукун, ттун ччан бикIай мунал чIарав бацIан, – тIий бур Эльмира.

Вай гьантрай МахIачкъалалив хьуссар Эльмира Ибрагьимовал «Возрождение Лакии» тIисса проектрал презентация. Шикку ПатIиматлул щаллу бувссар ацIваксса балай.
Лавай кIицI лавгсса кIива мисалданул цал ххишалану тасттикь буллай бур цуксса агьамшиву дуссарив чIаравманал, лагма-ялттуминнал къулагъасрал, дакI дуванмур учаврил, баврил, инсаннан захIматсса чIумал кумагран тIитIин дурсса канил.
НукIувагу увкусса куццуй, ПатIиматлун балайчитураву яла ххирар Лариса ХIажиевал творчество. Ларисал балай ванин цалчин бавну бур «Шаг к звездам» тIисса концертрай, му баяйхтува ххирагу хьуну бур. Муния махъ Ларисал балайрдах вичIи дихьлай лакку маз лахьхьинсса гъирагу чантI куну бур ниттил маз сайки кIулну къабивкIсса душниву. Махъ Лариса ХIажиевал ПатIимат Гъавзиевайн цила концертрайн гьуртту хьун оьвкуссар.

ЦIухлай бура ПатIиматлухь соцсетирдавасса цаннийсса цила блограя. Ва бачин бувнугу ПатIиматлул чIярусса шиннур, бити, му мудан музыкалун хас бувсса къабивкIхьурчангу. Тти махъ тIурча, ва хъунмурчIин музыкалун, балайрдан хас бувсса бур. Ванил 12 азара подписчикнаву, лак бакъасса, цайми миллатирттал инсанталгу бур. ЧIявумур чIумал халкьуннал балайрдах къавичIидишайсса жагьилтал бур цивппагу чIявуми. Ванил блограйн, шикку ванил лакку мазрай буллалисса ихтилатирттайн, тIутIисса балайрдайн бувну лакку мукъухсса, халкьуннал музыкалухсса, балайлухсса ччаву гьаз хьуссагу бур къачансса. Вай гъирарай ваничIан хъин-хъинсса махъру чичлангу бикIайссар. Амма цал-цал буккайссар тIааьн бакъамур чичлачимигу, мукунминнан чIунгу, гужгу харж къабувайссар ПатIиматлул. Амма ххуйсса хъинсса махъру чичлачимигур цал-цал жаваб дакъа личIайсса, мугу ПатIимат ичIаллил къайгъурдаха хъирив къалавну ягу махъунмай чичин намус хьуну.
Вана укунсса бур ПатIимат Гъавзиева, творчествалувугу, оьр­мулувугу чIявучиха къалавхьхьусса, ляличIисса.