[dropcap]М[/dropcap]ай зурул 23-нний Ккуллал райондалул школарттай рирщунни махъра-махъсса занг. Ва кьинилул жула дакIурдиву хIасул бувай ххарисса ва жагьжил буллалисса лахIзарду. Ххарину бикIару жува, жула оьрчIал школа къуртал буллалисса чIун дуркIунни тIий. ДакIний жагьжилшивугу дикIай, гихунмайсса гайннал оьрму цукун бачививав тIийгу.
Ккуллал райондалий гьашину 11 класс къуртал буллай ур 55 оьрчI.
Ккуллал райондалий гьашинусса дуккаврил сияхIрай ур 825. Вайннавату 11 класс къуртал буллай ур 55 оьрчI, 9-мур класс къуртал буллай ур 92 оьрчI.
Ттун гьашину бахтти хьунни махъра-махъсса занг ришлашисса Ваччиял школалийсса тяхъашиврух ябитан.
[dropcap]Ш[/dropcap]колалул хIаят дия чIюлу дурну оьрчIал, баннердал, ранг-рангсса шарикирттал. Амма яла чIюлуми бия школа къуртал буллалисса оьрчIру. Лагмасса гьавагу оьрчIал нитти-буттахъал каруннихьсса сирень-тIутIал кьункьал бувцIуну бия.
Дайдирхьуна махъра-махъсса занг рищаврин хас дурсса тяхъашивуртту. Шадлугъ нани дурну бия учительница Загьидиева Ирина. ОьрчIру школа къуртал буллалисса кьини барча дуллалисса махъру лавхъуна: школалул директор Мирзаева Бажил, завуч Аьлибеков Аьлибеклул, райондалул УО-лул каялувчи ХIаммакуева Альбинал, культуралул хъунмур Ибрагьимова Маринал, ЗАГС-рал хъунмур Илиясова Сабринал, Ваччиял шяраваллил бакIчи МахIаммадов Арсеннул, выпускниктурал цалчинмур учительница ХIусайнова ХIабибатлул, классрал каялувчи Мяъсудова Марзиятлул, цалчинмур классрал дуклаки оьрчIал, нитти-буттахъал.
ОьрчIал бувккуна цала учительтуран хас бувсса шеърирду, увкуна барчаллагьрал махъру. Дуллай бия кувннан кув тIутIив, бахшишру. Хьуна цаймигу тяхъашивуртту. Яла рирщуна махъра-махъсса занг. Ва занглил чIугу хъиривну оьчIру бувккуна бугьарамур оьрмулул ххуллийн. ТIайлабацIу хьуннав зун!
