![](https://ilchi.info/wp-content/uploads/2020/08/frfftujtyujtyfg.jpg)
Уттигъанну гъан-маччаминнал дянив цила оьрмулул юбилей хьунадаркьунни химиялул элмурдал кандидат, ДГУ-лул фармацевтикалул ва аналитикалул кафедралул профессор, Хъусращиял шяравасса Ттаттаева Сарижат Жабраиллул душнил.
Сарижат Жабраиловна ххуйну кIулссар жулла республикалул педагогикалул агьалинан. ЗахIмат ххирасса, цилва хьхьичI бивхьусса мурадирттачIан дакI дарцIуну бачайсса, циятура ва цила тарбия буллалиминнаяту ларайсса тIалавшинна дусса Сарижатлул авторитет хъуннассар ДГУ-лул студентътурал ва преподавательтурал дянив. Хасну вай хасиятирттайн бувнур ва элмулуву ва кIулшиву дулавриву ларайсса хьхьичIуннайшивурттайн лавхъсса.
[dropcap]С[/dropcap]
арижатлул 1968-ку шинал мусил медальданий къуртал бувссар Хъусращиял дянивмур даражалул школа. 1973-ку шинал тIурча, мукунма марцIсса ххювардайнну къуртал бувссар ДГУ-лул химиялул факультетгу. Кандидатшиврийнсса диссертациягу дурурччуну, 1973-ку шиная шинмай преподавательну зий бур цилва къуртал бувсса факультетрай.
Ва бур 300-нния лирчусса элмийсса публикациялул, дуккаврил 15 пособиялул, 20 патентрал автор. Сарижат лайкь хьуссар щалагу Аьрасатнал Изобретательтурал ва рационализатортурал обществалул мусил ва арцул медаллан, грамотарттан. Ва бур АьФ-лул ларайсса пишакарсса кIулшиву дулаврил бусравсса зузала, Дагъусттан Республикалул кIулшиву дулаврил лайкь хьусса зузала. Дуклаки оьрчIал ва студентътурал элмийсса проектирдай каялувшиву дуллалаврихлу ва лайкь хьуну бур АьФ-лул КIулшиву дулаврил ва элмулул министерствалул юбилейрал медальданун.
Щинаву кадмий циксса буссарив чIалачIи бувайсса хасъсса электрод сакин даврин хас дурну дур Кьурбан МахIаммадовлул ва Сарижат Ттаттаевал элмийсса даву, патентран лайкьгу хьусса.
Сарижатлул ва ванил лас Кьурбанзагьид Ттаттаевлул дянив бивзун бур, цивппа кунма, ххаллилсса кIива оьрчI – Эмиль ва Эльмира. Вайгу хъанай бур, так гъан-маччаминнал бакъассагу, щаллагу щарнил пахруну.
ХIурмат бусса Сарижат Жабраиловнай! Вил оьрмулул позиция, марцIсса захIмат, буттал аьрщарахсса хIакьсса ччаву хъанахъиссар махъа нанисса никирансса эбратну. Виятуру жу лахьлахьисса ватан ххирашиву, захIматний хьхьара къадаву. Къуманий вичIанну бучIайсса маслихIатрал хъиривгу.
Шайссаксса чIяруну духхаваннав вил къушлийн байранну, вил дакI мудангу гъили даваннав ичIуваминнал, гъан-маччаминнал ччаврил, личIлулсса бургаврил.
ДакIнийхтуну барча тIий бура вихь юбилей! ЧIа тIий бура вин цIакьсса цIуллу-сагъшиву, дакIнил ва чурххал бухкъалагайсса бюхъу.
Камилла АьвдурахIманова,
ДГУ-лул филологиялул
факультетрал журналистикалул отделениялул студентка