Мартрал 16-нний «Дагестан» РИА-лул редакциялий хьунни «Газпром газораспределение Дагестан» ва ДР-лул Росреестрданул управлениялул цачIусса пресс-конференция.

Му хас дурну дия социал газификациялул программалул ва къатри газрал сетирдацIун базаврил ихтиярдансса регистрациялул масъаларттан.
Журналистътурал суаллахьхьун жавабру дуллунни Росреестрданул управлениялул каялувчи Арсен ПирмахIаммадовлул ва «Газпром газораспределение Дагестан» идаралул гендиректорнал хъиривчу Расул Юнусовлул. Ванал бусаврийну, Дагъусттаннал ялапарлувтурал дуллуну дур 14 500 заявка догазификациялул хIакъираву, чирчуну дур 14 100 договор, миннува 12000 бартдиргьуну дур. Уттигу бюхъантIий бур базин 12000-нниха ливчусса къатри, ялапарлувтураща бюхъантIий бур му хIаллихшин ласун 30 кьинилул дянив. ЦIанасса ппурттуву республикалий газрал сетирдацIун дарзуну дур 12000-нниха лирчусса къатри, миннува 2000-нниха лирчусса – 2025 шинал. Газ бувцуну бур мукунма 10 социал объектрачIан.

ПирмахIаммадовлул тIимунийну, догазификация къадаврил хъунмур савав хьуну дур къатлул залунначIа къатта ягу га къатта бусса участокрал документру ЕГРН-луву сияхIрай бакъашиву. КIилчинсса савав дур объектрал (къатлул) статус къатIайласса бушиву.
«Программалувун дагьайссар так инсантал ялапар хъанахъисса къатри. Агана объект хIисавну бухьурча «Садовый дом» тIий, му чIумал статус баххана буван аьркинссар «жилой дом» тIий чивчуну. Газ базаврийн дайшишруну хъун бюхъайссар участокрал дазурду балжину цIакь къадавугу, ягу ми чIаххувсса дазурдайн дуклай душивугу. Газ къатрацIун базаврийн пишакартал инкар къахьуншиврул, къатрал заллухъруннан аьркинссар къатрал документру ЕГЕРН-луцIун бавкьуну бурив ххал буван газ буцай чIун дучIаннина», – увкунни ПирмахIаммадовлул.

ХIасан Аьдилов