Бусравсса, махъ нанисса, иш бавчусса лакрал сияхIраву хьхьичI ххуттай кIицI лаган бучIиссар жагьилсса аьлимчу, паччахIлугърал ва жяматрал ишккакку, Аьрасатнал хьхьичIунсса экономист, 6-мур созыврал ПаччахIлугърал Думалул аппаратрал советник, Аьрасатнал текстильщиктурал Ассоциациялул президент, «Деловой центр экономического развития СНГ» тIисса Ассоциациялул куклу промышленностьрал комитетрал каялувчи Ильдаров Шамххал Адамлул арснал цIа. Ванал биографиялух бурувгукун чIалай бур гьарица чулуха гьунар бусса, сивсуну хьхьичIунай нанисса, бюхъу-бажар ххисса пишакар ушиву.
Увну ур Шамххал 1972 шинал август зурул 31-нний МахIачкъалалив.
1989-ку шинал МахIачкъалаллал школагу мусил медальданий къуртал бувну, увххун ур С. Орджоникидзел цIанийсса Москавуллал Управлениялул университетравун.
1994-ку шинал му къуртал бувну, «Менеджмент, экономика и управление на транспорте» пиша лавсун бур. 1998-ку шинал миккува аспирантурагу къуртал бувну, элмурдал кандидат хьунсса диссертация лайкьну дурурччуну дур. Дуклакисса шиннардий Шамххал чялишну гьуртту шайсса ивкIун ур жяматийсса давурттавух, агьну ивкIун ур лачIун буккаврил спортрахун.
1994-ку шинал ва хьуну ур «Джон-Адамс» тIисса Аьрасатнал ва Китайнал цачIусса предприятиялул хъунама директор. 1995-ку шинал ивтун ур Дунияллул халкьуннал дянивсса Корпорациярдал институтрал элмийсса зузалал къуллугърай. 1999-ку шинал Шамххал хьуну ур вава институтрал вице-президент. 2004-ку шиная шихунай ва ур «Фабрика Люсин» тIисса текстильно-швейный компаниялул директор.
2009-ку шинал сакингу дурну, каялувшиву дуллай ур Аьрасатнал текстильщиктурал ассоциациялий. Мукуна ва ивтун ур Москавуллал управлениялул университетрал кафедралул хъунаманал хъиривчунугу.
2011-ку шиная шихунай Шамххал ур ПаччахIлугърал Думалул аппаратрал советник, экономикалул политикалул, инновациялул лябуккаврил ва предпринимательствалул комитетрал эксперт.
2012-ку шиная – Москавуллал Муниципал сакиншиннардал советрал член.
2013-ку шиная айивхьуну Шамххал каялувшиву дуллай ур А.Н. Косыгиннул цIанийсса Москавуллал университетрал Экономикалул ва предпринимательствалул кафедралий.
2023-ку шинал декабрь зуруй ва ивтун ур «Деловой центр экономического развития СНГ» Ассоциациялул куклу промышленностьрал комитетрал хъунаману. КIицI ларгсса структуралул хъунама хIисаврай ванан ччай бур СНГ-лувун духлахисса хIукуматирттал хIала-гьурттушиву цIакь дансса, гьарта-гьарза дансса давурттив дуллан, цала-цала опытгу кIибачIлан, производствалул масъаларттугу цачIу чялишну бартбигьлан.
2002-ку шинал ХIукуматирттал хъуниминнал советрал, СНГ-лул Экономикалул советрал ва исполнительный комитетрал сипталий гьану бивзсса «Деловой центр экономического развития СНГ»Ассоциация зузиссар шивун духлахисса хIукуматирттал экономикалул лябуккулул стратегиялул лагрулий 2030-ку шинайн бияннин. Организациялувун бухлай бур 22 профильный комитет. Комитетирттавунгу бухлай бур ва отраслилувусса бизнесрал ккураннал сий дусса вакилтал, мукунма машлул, экономикалул ва инвестициярдал хIала-гьурттушиврул экспертътал. ЦIанасса чIумал Шамххал ур ПаччахIлугърал управлениялул университетрал доцент, докторант. Ванал итадаркьуну дур 200-нния лирчусса элмийсса давуртту. Шамххал лайкь хьуну ур личIи-личIисса ПаччахIлугърал ва спортрал наградарттан. Ва чялишну гьуртту шай «Дагестан» Москавуллал Культуралул центрданул дуллалисса давурттаву.
Лавайсса къуллугъгу барча тIий, чIа тIий буру ххаллилсса лаккучувнан гьарица ишираву тIайлабацIу, мудан хьхьичIуннайшивуртту.
Арсен ХIусайнов, «Дагестан» Москавуллал Культуралул центрданул президент, профессор, техникалул элмурдал доктор,
РАВН-лул академик
ХIадур бувссар Андриана Аьбдуллаевал
