Мартрал 1-нний МахIачкъалалив Р. ХIамзатовлул цIанийсса Миллатрал библиотекалуву «Республикалул халкьуннал ххуй-хъиншиву» («Народное достояние республики») проектрал лагрулий хьунни цIа дурксса фотохудожник Камил Чутуевлущалсса хьунабакьаву.

Бадрижамал Аьлиева
Хьунабакьаврийн бувкIун бия республикалул интеллигенция, личIи-личIисса вузирдал студентътал, шагьрулул школардал дуклаки оьрчIру, фотохудожникнал гъан-маччами, дустал.
БатIаву дачин дурну бия Миллатрал библиотекалул культуралул программарттал отделданул хъунмур Муслимат Абакарова.
Республикалий ва мунил кьатIув цIа дурксса суратрищу Камил Чутуевлул оьрмулия ва творчествалия бувсуна библиотекарь Ольга Аьлиевал.
ХхюцIаллийхъайсса шиннардил лахъишиврия сакин хьусса цала захIматрал ххуллий Камил Чутуев цимилгу гьуртту хьуну ур билаятрал ва республикалул лагрулийсса личIи-личIисса выставкарттай ва конкурсирттаву. Чутуевлул суратру дур марцIсса зунттал гьавалул дурччусса, зунттал билаятрахсса ччаврил видурцIусса.
Миллатрал библиотекалул краеведениялул ва миллатрал литературалул отделданул хIадур дурну дия Камил Чутуевлул давурттал «Ттул яла ххуйми щугълурдал улча» тIисса цIанилусса выставкагу, Экологиялул шинан хасну. Ккаккиялун дирхьуну дия личIи-личIисса шиннардий рирщусса суратру. Цунияргу хъинну Камил Чутуев буслай ур, чил инсантурахьгу, гьарца кьинисса къайгъурдаха лагма-ялттумур, тIабиаьт хIисав къахъанахъи­сса дагъусттанлувтурахьгу, цуксса ххаллилсса, караматсса кIану буссарив жулва Дагъусттан ва цукун хъуннасса агьамшиву ду­ссарив мунил ххяххияртту ва жанаварт, хъин-хъинсса аьдатру ва кIанттурду буруччаврил.
Ва кьини Камиллуя махъ учин ччими чан бакъая: чичу, журналист Сулайман Мусаев, «Илчи» кказитрал хъунама редактор Руслан Башаев, «Техноград» центрданул директор Исрапил Аьлиев, искусствовед Мариян Чалабова, шаэр, художник, журналист Марат ХIажиев, Дагъусттаннал халкьуннал чичу МахIаммад-Расул ва цаймигу.
Ихтилатру буллалими кIицI лаглай бия Камиллул художник хIисаврайсса ляличIисса гьунар, дунияллухсса ургаву, цайминнан ххал къашаймур итталун дагьайсса художник ушиву, ца суратралшиврий цава-ца кIанайн цимилагу ияйшиву, цимирагу километра ритайшиву. Ихтилатру буллалиминнал зумату къачанъя Камиллул цIаницIун бавхIусса хIазсса хавардугу, мунащал архIал хьу­сса аьрххирдая бусанмургу. Буслай бия кулпатран ххаллилсса лас, ряхва оьрчIан, ацIния шанма оьрчIал оьрчIан ва мукьва оьрчIал оьрчIал оьрчIан эбрат­рансса ппу ва ттатта ушивугу.
Цала хьхьичIунсса дусная, цала учительная ихтилат буллай, Марат ХIажиевлул кIицI лавгунни Камил ялапар хъанай ушиву «Дуллалимур дуллан аьркинссар гъирарай» тIутIисса оьвчаврий.
Карашатусса Исрапил Аьлиевлул кIицI лавгунни Дагъусттаннал аьдатирттал бакIщаращущал цува кIул хьушиву Камиллул суратирттайну, дакIнийн бувтунни Камиллул гьунардавасса цану бушиву усттарну мандолина бищавугу, укунсса усттаршиву махъа нанисса никирайн диян дуван аьркиншиву.
Ва кьини библиотекалул конференц-залданувун бавтI­миннал Камил Чутуевлухьхьун булунсса суаллу чIявуя, давриясса, кулпатраясса. Миннун жаваб дуллай, фотохудожникнал бувсунни 4-мур классраву дуклакисса чIумал цанма бу­ттал лавсун бивкIшиву цалчинсса фотоаппарат, махъ цува, ДР-лул Журналистътурал союзрал тIайла ув­ккун, билаятрал лагрулийсса семинардайн, аьрххирдай Москавлив хъунмасса гъирарай занай ивкIшиву, ми цавагу лях гьан къабитлай, микку мякьну вичIи дихьлай ивкIшиву билаятрал язими фотокорреспондентътурах.
Мажлис балайрдайну ва назмурдайну чIюлу бунни МахIачкъалаллал 16-мур школалул лакку мазрал учительница ПатIимат Аьлиевал каялувшиндарайсса дуклаки оьрчIал. Гьунар бусса чIава балайчи ЦIаххай МахIаммадовлул рурцусса макьаннахун миннал увкунни балайрду, дурккунни лакку улклухасса, ниттил мазрахасса наз­мурду.
Вечерданул лахъишиврий экрандалий ккаккан дуллай бия Камил Чутуевлул суратру.
Мажлисрал байлитIулий Камиллул барчаллагь увкунни батIаву дурсса библиотекалул зузалтрахь.