ЦIуссалакрал райондалий аьдатравун багьну бур цIушинацIунсса байрандалул мажлисрай дуккавриву хьхьичIунсса оьрчIру лахъа-хъун бувну бахшишру даву. Гьашинусса мажлис хьунни Гьамиящиял школалий.
Андриана Аьбдуллаева
[dropcap]Б[/dropcap]айрандалун лавхьхьуну чIюлу бувсса залданувун бавтIун бия райондалул циняппагу школарттаясса ххювардай дуклакисса ва личIи-личIисса райондалул ва республикалул конкурсирттай, олимпиадарттай хьхьичIунсса кIанттурду бувгьусса оьрчIру. Вай барча бан бувкIун бия райондалул бакIчи МахIаммадхIажи Айдиев, ванал хъиривчутал ХIажи ХIажиев ва Алик Исрапилов, шяраваллал бакIчитал, кIулшивуртту дулаврил управлениялул вакилтал, школарттал директортал.
ХIакьинусса кьини ЦIуссалакрал райондалул школарттай ур ххювардай дуклакисса 465 оьрчI. Вай ххуйсса ккаккиярттур. Райондалул бакIчинал канища бахшишру ларсминнавух бия шанна-мукьра журалул конкурсирттай ххув хьусса оьрчIру. Ва кьини бахшишру дунни оьрчIру конкурсирттайн хIадур бувсса учительтурангу.
[dropcap]Р[/dropcap]айондалул дуклаки оьрчIал ккаккан бунни цала гьунарду хъирив хьусса ххаллилсса концертрал программалувугу. Муния махъ райондалул бакIчинал баян бувна хъиривмур шинал укуннасса шадлугърай арцуйнусса бахшишру дантIишиву шанма яла язимур вокалданул ва хореографиялул группалун(100 азарда къуруш – 1-мур кIанттух, 70 азарда – 2-мур, 50 азарда – 3-мур кIанттух), мукунма ацIва хьхьичIунсса номерданун дулунтIишиву ацI-ацIазарда къуруш. ЦIушинал мажлис къуртал хьуна Дякъил-Ттаттащалсса ва Марххала-Душнищалсса дялахърулийну.
