Кулпатрал ва ччаврил кьинилун хасну, июльданул 8-9-нний Москавлив «Россия» цIанилусса Национальный паркраву хьу­сса Щалагу Аьрасатнал «Россия. Соединяя сердца» тIисса фестивальданий гьуртту хьунни Дагъусттаннаясса жагьилтал, цIуну хьусса лакрал кулпат – ХIажи ва Милана Ибрагьимовхъул.

Ттигъанну бувсса вайннал хъатIуясса видеорду ва суратру ххал къадурсса нажагьсса бакъа къаливчIхьунссар. ХIажинал ва Миланал хъатIул аваза дунияллул гьарцагу мурцIнийн бив­ссар учирчангу, щялмахъ къахьунссар.

ДакIнин бутан, цIуну хьусса кулпатрайн цачIанма оьвкуну, вай билаятрай Кулпатрал кьинилун хасну шамилчин хъанахъисса фестивальданийн тIайла бувкссар Дагъусттан Республикалул бакIчинал буржру биттур буллалисса Федор Щукиннул.
«Россия. Соединяя сердца» фестивальдания циява тIурча, ва цалчин хьуссар 2024-ку шинал Дунияллул халкьуннал дянив­сса «Россия» тIисса выставкалий-форумрай.

Муния шиннай аьдат­равун дагьну, фестиваль дуллалиссар гьар шинах Кулпатрал ва ччаврил кьинилун хасну. Ваний гьуртту хъанахъимигу шиная шинайн чIяву хъанай бур. Ва шин Аьрасатнал Халкьуннал цашиврулмурну баян бувну духьувкун, гьашинумур фестивальданул темагу диркIссар «Едины в любви» тIисса. Фестивальданул хъун бакъасса тарихраву цалчин ваний гьуртту хьуссар интернационал ва чил билаятирттаясса жагьилсса кулпатру – Белоруссиянавасса, Къазахъисттаннаясса, Къиргъизнавасса ва Арманинавасса.

– Фестивальдания махъсса асарду ттигу хъунмасса хIаллай личIанссар жуву. Жу хъинну ххуйну кьамул бувунну. Ва хьунни билаятрал лагрулийсса хъинну хъуннасса ва яргсса шадлугъ, билаятрал гьарца региондалиясса, цалла-цалла культуралущалсса, оьрмулухсса ва дунияллухсса бургаврищалсса личIи-личIисса инсантал гьурттусса хъуннасса байран. Фестивальданул ахирданий хьусса хороводрай жу бивзру наврузбагнал ва жалиндалул къавтIаврий, – буслай ур ХIажи.
Цалва жагьилсса оьрмулул 15 шин «Ватан» къавтIаврил ансамбльдануву гьан дурсса ХIажи цалчин акъар укун хъунмасса сахIналийн, укун чIявусса тамашачитурал хьхьичIун уклакисса. Ванал цимигу сахIна тимар був­ссар, цикссагу тамашачитал ясир бувссар. Творчествалия архсса, медикнал пиша язи бувгьусса Миланарив цалчинни бувксса укунсса сахIналийнгу, вайксса инсантурал хьхьичIунгу. Амма, ХIажи кунасса жагьил чIарав усса чIумал, сахIналийн буккангу, зунттуйн лахъангу нигь дикIайссарив!?
ХIажинал ппу, Эльдар, ур Къяннал шяравасса, нину, Гульнара – бачIи ЧIарату (КIунди-ЧIар), бачIи – ГьунчIукьатIату. Милана бур ЧIарату.
ХIажинащалсса гьарта-гьарзасса ихтилат бищунну кказитрал хъиривмур номерданий.
Бадрижамал Аьлиева