Дагъусттаннай «Рамазан барз ва цIуллушиву» тIисса цIанилу ихIсандалул профилактикалул акция дайдирхьунни. Ва сахарный диабет дусса инсантуран зума дугьаврил ппурттуву зарал къахьунсса мурадрайсса даву дур Дагъусттаннал Минздраврал, Биомехатроникалул НИИ-лул ва Дуки-хIачIиялулсса буллалисса щаллагу дунияллул конгрессрал республикалул Муфтиятращал уртакьну дуллалисса.

Дагъусттаннай усса ур 45 000 инсан сахарный диабетрал инжитсса, вайннавугу чIявуминнал зума дугьайсса дур. ХIакинтал бур агьалинаву цивппа ва азар дусса къахаварссагу чIявусса буссар, ца диабетикнал ялун 2-3 преддиабет дусса ххиуварчан, аьдад хъун хъанахъиссар тIий. Хъирив къаувксса, лахъисса чIумуй анализру къадуллусса инсаннан цанмавагу диабет душиву къакIулсса ишру чIявуну ялун личайсса бур.

Ялув кIицI лавгсса Биомехатроникалул элмийсса институтрал каялувчи МахIаммад МахIаммадов ур агьалинан чара бакъа бувчIин буллан багьлай бур диабетгу, цайми азардугу дусса инсантурал тагьар хьхьара хьунгу бюхъайшиву, цукун занакьулу хъанан аьркинссарив маслихIат буллалисса даву гужлан дувантIишиву динчитурахгу вичIи дирхьуну.

Рамазан зурул мутталий Дагъусттаннал циняв медпункру дузал бувантIий бур оьттувусса нацIушиву ххал дигьайсса диагностикалул оборудованиялул: 800-нния лирчусса глюкометру, 140 000-нния ливчусса тест-полоскартту ва цаймигу глюкозалул тагьар ххал дигьайсса затру. Мукунна аьркин дагьайсса системарду. Республикалул медициналул циняв центрду диабетиктуран аьркинмунил дузал бувну бусса бур.

Мукунма мизитирттаву консультацияртту дуллай, ка-кумаг бувангу хIадурсса медициналул зузалтгу дежурствардай бикIантIий бур.
Агентствалул ва печатьрал каялувчи Арсен Юсуповлулгу кIицI лавгунни, республикалул СМИ-лулгу ва акциялуву ххуйсса гьурттушинна дувантIишиву, дуллалисса давриягу гьарза-гьартану буслантIишиву.

П. Рамазанова