Грозныйлив хьунни Ухссавнил Ккавкказуллал Парламентрал Ассоциациялул (СКПА) XI-мур конференция. Ваний гьуртту хьунни Дагъусттаннал парламентрал хъунама Заур Аскандаров бакIчину республикалул делегация.
Шикку бия вице-спикер Камил Давдиев ва Халкьуннал Мажлисрал ххюва комитетрал каялувчитал: Артур Исрапилов, Сефер Аьлиев, Илияс Мамаев, Асият Аьлиева ва Фирудин Раджабов. Вайннал конференциялий хьхьичIун ларсунни «О свободе совести и о религиозных объединениях» тIисса федерал закондалуву дахханашивуртту дуваву мурадрайсса проект. Балжину ва проектрая бувсунни Фирудин Раджабовлул. Ва проектраха зий бивкIун бур Заур Аскандаров, Камил Давдиев ва Фирудин Раджабов. Ванал бувсунни, ва закондалийн бувну, хьхьичIава судрал хIукмулийн бувну ларкьусса, дукьан дурсса динийсса ккуранну цIунилгу хIасул дуллансса къадагъа дикIан аьркиншиву. Мукунма динийсса литература итадакьлансса ва машгьур дуллансса ихтияр дикIан аьркиншиву анжагъ централизованнайсса динийсса идарарттахь. Ванийну экстремист литература машгьур дуллалаврил ххуллу кьукьлакьисса чаран хьунтIишиву. Ва проект ПаччахIлугърал Думалул ххал дигьинсса маслихIат бунни Парламентрал Ассоциациялул члентурал.
ПатIимат Рамазанова
