«Дагестан» РИА-лий хьунни ДР-лул культуралул министр Зарема Буттаевал пресс-конференция. Шикку министрнал бувсунни яла нанисса шинаву дурсса ва ялун нанисса шинаву дан дакIнийсса давурттая.
КIицI лавгунни ведомство чялишну зий бушиву республикалул магьирлугъ хьхьичIуннай даврил ххуллий, шиная шинайн чIяву буллай ва аралуву зунсса инсантал.
«ХIасиллу дуллан бигьану къабикIай, бусанмур чан бакъахьувкун. Гьашину щурущи бувну къуртал хьуссар миллатрал проект «Культура». Проект щуруй буссаксса мутталий республикалий дурссар 6 магьирлугърал къатри, капитальныйну ремонт дурссар 47 (вайннува Лакрал райондалий кIирайра – Гъумуксса ва ГьунчIукьатIувсса), цIу буккан бувссар 8 магьирлугърал школа.
Ялун нанисса шинаву «Культура» проектран кIанттай щуруй байбишинтIиссар «Семья» тIисса цIусса проект. Ванил лагрулийгу дуллантIиссар тайра «Культура» проектравун дагьлай диркIсса жяматрал тIалавшинна хъуннасса давуртту: зунтIиссару магьирлугърал къатри, оьрчIал магьирлугърал школарду цIу буккан бавриха ва капитальныйну ремонт бавриха, вай идарартту музыкалул инструментирттал дузал бавриха, автоклубру машан ласавриха, региондалул филармонияртту цIу буккан бавриха.
Ва программалул лагрулий цIусса шинаву зий байбишинтIиссару Дагъусттаннал паччахIлугърал филармониялул къатри цIу дуккан дуллай. ДР-лул Халкьуннал Мажлисрайнсса цала Рисалалуву Дагъусттаннал бакIчи Сергей Меликовлул кIицI лавгуна вай къатрал тарихийсса сипат ядаврил агьамшиву», – увкунни Зарема Буттаевал.
Ххи бунни ялун нанисса шинаву щуруй байбишин тIий бушиву «Земский работник культуры» тIисса цамургу цIусса проект. Ванил лагрулий шяраваллаву зун нанисса пишакартуран кумагран паччахIлугърал булун ккаккан бувну бур ца-ца миллион къуруширттал. Уттинин ларсун дур 6 пишакарнал.
Яла нанисса шинаву чIярусса мероприятияртту хьуну дур Дагъусттаннал халкьуннал шаэр Сулайман Стальский дунияллийн увккун 155 шин шаврил юбилейран хасну. Щурущи бувну бур «Единая Россия» партиялул проект «Культура малой Родины».
Бувсунни агьали магьирлугърал чантI учин баврил ххуллийсса мероприятияртту дуллай бушиву республикалий бакъассагу, мунил кьатIувгу, Аьрасатнал Культуралул министерствалул кабакьаврийну. Министрнал бусаврийн бувну, республикалул творчествалул коллективру чIун ляхну лагайсса бур хасъсса аьралий операция нанисса кIанттурдайн, жула аьралитурал дакIру дан, гьавас бутан.
Дайдихьу дурну дур «Лезгинка» ансамбльданул, шинал дайдихьулий Луганск шагьрулийн лавгун. Вайнная махъ аьралитурансса концертрал программалущал лавгун бур «Дагестан» ва «Темирхан-Шура» ансамбльлу, мукунма филармониялул солистъталгу.
Министрнал ххи бунни, ялун нанисса шинавугу занан тIий бушиву магьирлугърал зузалт, жула аьралитал тяхъа бансса, тайннал дакIурдивун гьавас бутансса программарттащал.
Зулайхат Тахакьаева
