Мартрал 25-нний жула билаятрай кIицI лагай Магьирлугърал зузалал кьини. МуницIун бавхIуну, республикалул магьирлугърал оьрмулуву ларгсса шинал хьусса агьамсса иширттая ва дан дакIнийсса давурттая ихтилат хьунни Дагъусттаннал культуралул министр Зарема Буттаеващал.
-Зарема Ажуевнай, щала билатрай кунна, паччахIлугърал чулуха хъуннасса къулагъас дуну щурущи дурну диркIсса «Культура» нацпроектрал кIанттай 2025 шинал щуруй дайдирхьунни цIусса проект «Семья». Ци давуртту дан бювхъур му проектрал лагрулий?
– «Семья» проектрал лагрулий тIайлабацIу буну щуруй дуссар регионнал проект «Семейные ценности, инфраструктура, культура». Проект дузрайн дуккан даврил ххуллий ларгсса шинал итадаркьуну дия 234 млн къурушрал. Ва шинаву итадакьин ккаккан дурну дур миллиардрайн дирсса.
Ларгсса шинал республикалий цIусса техникалул щаллу бувссар Поэзиялул театр. ЦIу буккан бувссар В. Макаровал цIанийсса Аьралий савлугърал музей. Капиталну бакьин бувссар Мурад Къажлаевлул цIанийсса Гьунар бусса оьрчIансса школа, Нугъайнал райондалийсса Тарихрал ва краеведениялул музей.
Республикалул бюджетрал ва нацпроектрал харжлугърацIух цIакь дан бювхъуссар Дагъусттаннал Национал музейрал кIива филиалданул инфраструктура. Дайдирхьуну дуссар цIу дуккан дуллай филармониялул къатри, 2027 шинайннин къуртал дантIиссар. Капиталсса ремонт дуллай байбивхьуну буссар кIива библиотекалий, Каспийскалийсса Магьирлугърал къатлуву, Къизлардайсса ОьрчIал магьирлугърал школалий. Бувссар шанма цIусса модел журалул библиотека, МахIачкъалалив ва Казбекуллал райондалий.
Аьрасатнал культуралул министерствалущал ххал бивгьуну буссар ва шинаву тIитIин ттигу ряхва мува журалул библиотека.
Ттигъанну байбивхьуссар ремонт дуллай Оьруснал драмтеатрданул къатраву. ЦIу буккан бувну, матахIрал ва музыкалул ярагъуннил лащу-щаллу бувссар оьрчIал магьирлугърал школарду, магьирлугърал къатри, театрду ва музейрду.
Ва шинавугу ремонт дан ккаккан бувну буссар библиотекартту, магьирлугърал къатри, районнайсса центрду. Каспийскалий буллай байбишинтIиссар цIусса оьрчIал магьирлугърал школа, 695 магьирлугърал идара бур ремонтрах мюхтажсса, 110 идара бур лекьавайсса тагьарданий.
Му бакъассагу, республикалий щуруйнна дуссар «Культура малой Родины» тIисса федерал партийный проект. Ванил кумаграцIух ремонтру дурссар мюрщисса шагьрурдал ва шяраваллал кIанттурдайсса кIива магьирлугърал къатлул, аьркинсса матахIрал дузал бувссар кьува магьирлугърал къатта, ряхва театрдануву бивхьуссар ацIния мяйва цIусса спектакль, кIива театрадануву цIу дуккан дурссар матахI.
Ва кьяйдалий ядуллалиссару жула региондалул ляличIисса аьдатру, хIасул дуллалиссару кIанттул сиптарду хьхьичIуннай дансса шартIру.
— Ларгсса шинаву магьирлугърал аралувусса цIушиннану хьунни «Земский работник культуры» тIисса программа. Ци журалул хIаллихшиннарду дуссар ва программалул лагрулий шяраваллил кIанттайн зун лавгсса зузалан ва цими зузалансса даву хьуссар ларгсса шинаву?
– Мяйжаннугу, махъсса ацIрахъул шиннардий шяраваллава агьали бизлай бушиврийн бувну, биял хъанай бакъар магьирлугърал зузалт. Ва тагьар дурчIлай, билаятрал президентнал сипталийну щурущи дурссар федерал проект «Земский работник культуры». Проектрал лагрулий шяраваллил кIанттай зун лавгсса магьирлугърал зузалан кумагран федерал бюджетрава дулун ккаккан бувну буссар ца миллион къурушрал.
Ларгсса шинал ряха зузала лавгссар шяраваллаву зун. Вайннавух кIицI бан бюхъанссар Гъумучиял оьрчIал магьирлугърал школалул директорну зун лавгсса Залихха Акаева. Гьашинугу шяраваллавун тIайла уккантIиссар ацIния ряха зузала.
— Цукунсса хьур республикалул магьирлугърал оьрмулуву Ватан дуруччул шин?
– Бюхттулсса Ххувшаву ларсун 80 шинал юбилейран хас дурсса Ватан дуруччул шин, щала билаятрай кунна, жула республикалийгу гьарза-гьартану кIицI ларгссар. Шинал лажиндарай, Дагъусттаннал гьарцагу мурцIний дакIнин дутлай буссия ватандалул ххуллий жанну дуллусса вирттаврал ник. Музейрдаву хьуссар выставкартту, театрдал бивхьуссар спектакльлу.
Яла агьаммур ишну хьуссар 9-мур Майрал кьини МахIачкъалаллал Хъун майданнив дурсса музыкалул ва театрданул постановка – «Нам не забыть победный май!». Ххюазарунниха ливчусса тамашачитал бавтIун бия ва мероприятиялийн.
— Ххюйлчинсса шин най дур жула ватанлувтал хасъсса аьралий операциялий ватандалул мурадру биттур буллай. Цукунсса кIану бугьлагьиссар республикалул магьирлугърал СВО-лул тагьардануву?
– Хасъсса аьралий операция нанисса шиннардий магьирлугъ дуссар агьали цачIун баврил ххуллийсса ярагъну дарцIуну.
Магьирлугърал ишккаккулт хъуннасса гьурттушинна дуллай буссар хасъсса аьралий операциялий талатиминнал ва цIусса территориярттал агьалинал чIарав бацIаврил иширттаву.
2023 шиная тIайла хьуну, жула коллективрду ва театрду занай буссар талаталал дакI дансса, мурахас бувсса кIанттурдал агьали аьчух буккан бансса программарттащал. Росконцертрал кумаграцIух «Лезгинка» ансамбльданул ларгсса шинал ва ЦIусса шин дайдихьулул гьантрай нюжмар дурссар цачIун дурсса территориярттал агьалинал концертру ккаккан дуллай. ЧIарадиял хор ва «Каспий» ансамбль гьуртту хьуссар Луганскаллан 230 шин шаврин хас дурсса мероприятиярттай. СВО нанисса кIанттай концертру ккаккан дурссар филармониялул солистътуралгу.
СВО-лул гьурттучитурайн ва вайннал кулпатирттайн мудан оьвчайссар магьирлугърал мероприятиярттайн. Хасъсса квоталул лагрулий республикалул магьирлугърал кIулшиву дулаврил идарарттай дуклай уссар 15 мобилизовать бувссаннал ва цала хушрай лавгминнал оьрчI. Му бакъассагу, СВО-лий талатисса аьралийтурал 744 оьрчI кьамул увссар ххисса кIулшиву дулаврил идарарттайн.
— Ци давуртту дан ккаккан дурну дуссар билаятрал президентнал Аьрасатнал Халкьуннал цашиврул шинну баян бувсса шинан хасну?
– Республикалул культуралул министерствалул ва шинаву дуллалисса гьарцагу даву дикIантIиссар Аьрасатнал Халкьуннал цашиврул шинан хас дурсса.
ХIадур дурну дуссар фестивальлал, выставкарттал, концертирттал планну. Мукунна чулийн дуккан дан ккаккан дурну дуссар Аьрасатнал Халкьуннал цашиврия бусласисса хасъсса проектру.
— Ларгсса шин авадансса дия магьирлугърал оьрмулуву хъунисса кIантту бувгьусса ишккаккултрал юбилейрттал, чансса дакъахьунссар ми гьашинугу.
– Мяйжаннугу Дагъусттаннал кIицI ларгссар республикалул пишакарсса магьирлугърал гьану бивзсса хъунасса композитор Готфрид ХIасановлул, художник МухIуттин-Аьраби Жамаллул, скульптор Хасбулат Аскар-Сариджанал 125 шин, щалагу Ухссавнил Ккавкказнаву яла хъунмур музейран ккаллисса Алибек Тахо-Годил цIанийсса Национал музейрал 100 шин, Къумукьнал театрданун 95 шин, совет заманнул ва Аьрасатнал хъунасса композитор, Аьрасатнал халкьуннал артист Ширвани Чаллаевлул ва Лакрал, Яруссаннал, Лазгиял театрдал, «Дагестан» къавтIаврил ва балайлул ансамбльданул 90 шин, Дагъусттаннал паччахIлугърал филармониялул 30 шин.
Гьашину тIурча, хъуннасса сийлий кIицI ларгссар СССР-данул халкьуннал артист Мурад Къажлаев дунияллийн увккун 95 шин.
100 шин хъанахъиссар Готфрид ХIасановлул цIанийсса МахIачкъаллал музыкалул училищалун.
Юбилейрал мероприятиярттал лагрулий дан ккаккан дурну дуссар кIулшиву дулаврил проектру, конкурс-фестивальлу, олимпиадартту.
Апрельданул 3-нний Къумукьнал театрдануву хьунтIиссар училище къуртал бувсса личIи-личIисса никру цачIун дуллалисса хъуннасса юбилейрал вечер. Ттуршра шинал юбилей гьашину кIицI лаглагиссар Готфрид ХIасановлул сипталийну тIивтIусса ца цамургу магьирлугърал кIулшиву дулаврил идаралул.
— Буси дузрайн буккан бан бювхъусса хъунисса проектирдаягу.
– Гъинттул республикалий хьуссар ХХIII-мур дунияллул халкьуннал дянивсса аьдатсса культуралул ва фольклорданул фестиваль «Горцы». Муний гьуртту хьуссар, Дагъусттанная бакъасса, Аьрасатнал цаймигу регионнаясса, Луганскаллал, Донецкаллал Халкьуннал Республикарттаясса, Къиримнавасса ва Севастопольлаясса коллективрду.
Сентябрьданий хьуссар гьарца шинал шайсса дуниялул халкьуннал фестиваль «Дни белых журавлей».
Апрельданий дайдирхьуну, кIива зуруй Дагъусттаннай най дуссия XVIII-мур Дуниялулул халкьуннал дянивсса музыкалул фестиваль «Порт-Петровские Ассамблеи». Мунил лагрулий С. Хржановскийл цIанийсса оркестрданухун балайрду тIий буссия дунияллул машгьурсса балайчитал Максим Рубцов, Доменико Нордио ва Михаил Лидский.
— Ци бусан бюхъанссар Дагъусттаннал коллективирдал ва магьирлугърал ишккаккултрал хьхьичIуннайшивурттая?
– Навагу лаккудуш бухьувкун, яла-ялагу пахру бансса ишну хьуссар Лакрал театрданул «Ниттил хъу» спектакль Аьрасатнал театрал постановкарттал «Мусил фондравун» багьаву ва «Золотая Маска» тIисса Аьрасатнал миллатрал ларайсса театрал премиялун лайкь шаву. «Бесприданница» спектакль тIурча, Кинешма шагьрулий «Горячее сердце» тIисса оьруснал классикалул драматургиялул дунияллул халкьуннал дянивсса фестивальданий мукьва-мукьва номинациялий ххув шаву.
Дагъусттаннал Ссихьрал театр Армениянаву «Театральный Лори» тIисса XXXI-мур дунияллул халкьуннал дянивсса фестивальданий лайкь хьуссар Арманинал халкьуннал артист Ерванд Манаряннул цIанийсса хасъсса премиялун. Ларайсса наградарттащал зана хьуссар Босниянава ва Герцеговинная, УзбакIнава, Китайнава. Дарбантуллал тарихрал, архитектуралул ва археологиялул музей-заповедник хьуссар Аьрасатнал Культуралул министерствалул премиялул лауреат, жагьилтуран кумагрансса «Пушкинская карта» программа хьхьичIуннай даврил ххуллийсса захIматрахлу.
«Лезгинка» ансамбль гьуртту хьуссар Бахрейннай, Оманнай, Индонезиянаву оьруснал магьирлугърал гьантрал лагрулий.
— Хъиривсса суал — цукунсса давуртту дан бювхъур лакрал районнай махъсса шиннардий?
– Бусан бюхъанссар, 2017 шиная байбивхьуну, хIакьинунийн дан бювхъусса давурттая.
Лакрал райондалий: Капиталну бакьин бувссар Гъази-Гъумуксса райондалул Магьирлугърал къатта, буллуссар идаралунсса автоклуб.
Мукуннасса ремонт дурссар ГьунчIукьатIрал Магьирлугърал къатлул, Гъумучиял ОьрчIал магьирлугърал школалун дуллуссар оборудование, музыкалул инструментру, къавтIалтрансса костюмру, ремонт дурссар Ккурккуллал Магьирлугърал къатри.
Щархъал магьирлугърал къатран буллуссар луттирдал фондру цIу буккан бансса субсидияртту, кумагрансса субсидияртту буллуссар хьхьичIунсса магьирлугърал зузалтрангу.
Ккуллал райондалий: капиталну бакьин бувссар Ккуллал Магьирлугърал къатта. Буллуссар щархъал магьирлугърал къатран луттирдал фондру цIу буккан бан кумагрансса субсидияртту.
КIицI лавгсса субсидияртту буллуссар ЦIуссалакрал райондалул магьирлугърал къатран ва зузалтрангу.
Барчаллагь хъунмасса, Зарема Ажуевнай!
Ихтилат бувссар
Зулайхат Тахакьаевал
