Вай гьантрай ГьунчIукьатIрал дянивмур даражалул школалул дуклаки оьрчIан хьунни хха­ллилсса бахшиш. Ва кьини дуклаки оьрчIащал хьунаакьин увкIун ия Дагъусттаннал Транспортрал ва ххуллул хозяйствалул министерствалул паччахIлугърал закупкарттал отделданул хъунама, Дагъусттаннал лайкь хьусса строитель, цIа дурксса альпинист Зиябуттин ХIажимирзаев.Ва хьунабакьаврий гьуртту хьунни ГьунчIукьатIрал ккурандалул хъунама ХIажибутта ХIусайнов, ванал хъиривчу Кьурбанаьли Ибрагьимов, ГьунчIукьатIрал шяраваллил бакIчи МухIад Штанчаев ва цаймигу бусравсса хъамал.

Мажлис байбивхьунни ГьунчIукьатIрал гимнрайну. Дук­лаки оьрчIал дурккунни КьурбанпатIимат Штанчаевал ва Жамисат МахIаммадовал назмурду. СахIналий ккаккан ду­нни Зиябуттиннул оьрмулул ва захIматрал ххуллия бусласисса видеортту ва суратру.
Мажлис тIитIлай, ванал оьрмулия ва лахъазанттая бусласисса ихтилат бунни ГьунчIукьатIрал шяравусса «Дараччи» ихIсандалул фондрал филиалданул каялувчи Сарижат Къушиевал.
Школалул директор Малик Къушиевлул кIицI лавгунни Зиябуттин жяматрал иширттавух чялишну гьуртту шайсса, оьрмулулгу, захIматралгу ххуллу эбратну бутлатисса инсан ушиву.
– Зиябуттин школалий хьхьичIунну дуклакисса, гьарица чулуха итххявхсса, учительтурангу, архIал дуклакиминнангу ххирасса икIайссия, – кунни ванал цалчинсса учительница Лидия Дандамаевал.
– Ванал хIурмат хъунмасса бур альпинистътурал дянивгу, дустурал ва даврил уртакьтурал дянивгу. Бусравну ур ГьунчIукьатIрал жяматран акъа­ссагу, цинявппа лакрангу. Къачансса гьунардацIун ванаву чичулмургу ххишаласса бушиву исват бунни ванал кIунттила бувксса «Вертикаль моей жизни» тIисса жужрал. ХIакьину Зиябуттин кунмасса инсантал эбратну хьун аьркинссар жагьилсса никиран, – увкунни ХIажибутта ХIусайновлул.
Зунттурдайн лахъансса гъира та, цукун багьссарив, гьарица лахъазанттул цукунсса асарду кьабивтссарив бусласисса, цинявннан бюххансса ихтилат бунни Зиябуттиннулгу.
Ихтилатру бувминнал кIицI лавгунни Зиябуттин пахру-ххара бакъасса, мюхтажнал чIарав ацIан, ка-кумаг бан хIадурсса, буттал кIанугу, миллатгу ххирасса инсан ушиву.
Ахирданий хьунабакьаву сакин дурминнахь ва шикку гьуртту хьуминнахь барчаллагь увкуна Зиябуттин ХIажимирзаевлул.
– Ттун хъинну асар хьунни ттула буттал шяраву, нава дуклай ивкIсса школалий, ххуйну хIадургу хьуну, бусравсса хъамаллурайнгу оьвкуну, дурсса ххаллилсса мероприятие.
ДакIнийхтунусса барчаллагь тIий ура школалул директор Малик Къушиев бакIчисса ххаллилсса коллективрахь, дуклаки оьрчIахь.
Ахирданий ххаллилсса шяравучунащал рирщуна дакIний личIансса суратругу.

Имара Саидова