Августрал 17-нния 21-ннийн МахIачкъалалив хьунни дукиялул кIилчинсса фестиваль «Вершина вкуса».
Цалчинсса фестиваль хьуссия ларгсса шинал «FoodStreetDag» тIисса цIанилу. Гьашину фестивальданул сакиншинначитурал мунин цIа даххана дурунни. Циванни жува къаччисса ингилиснал цIанилу байранну дуллан?
Фестиваль сакин дурну дур МахIачкъала шагьрулул администрациялул республикалул цаппарасса ведомстварттащал ва «Дагестан» РИА-лущал цачIуну. Сакиншинначитурал тIутIимунийн бувну, ва фестивальданий жула ишбажаранчитураща бюхъан тIий бур цалла дуллалисса дукия ккаккан даврийну бизнесрал чулийнмай агьали кIункIу буван.
Ваний гьуртту хьунни жяматрал дукра дукайсса республикалул хьхьичIунсса 50 идара. Фестиваль сававну вай идарарттаща бювхъунни цала дукия ярмаркалий дишаврийну рынокрайн дуккан дуван, дукиялуха зузиминнащалсса дахIавуртту цIакь дан, личIи-личIисса конкурсирттай ва мастер-классирттай гьуртту хьун. Му бакъассагу, фестивальданий гьуртту хъанахъиминнаща бювхъунни республикалул гастрономия хьхьичIуннай дансса маслихIатру бан. Фестивальданий мукунма гьуртту хьунни цIанихсса цIигьуртал, гастрономиялул бизнесрал, ассоциациярттал ва ккураннал вакилтал.
Фестивальданул лагрулий сакин бувну бия гастроиндустриялун, туризмалул индустриялун ва хъамал кьамул баврин хас бувсса мастер-классру, ккуркки столлу. Вайннуй гьуртту хьунни рестораннал ва кафердал бизнесрал вакилтал, тIабиаьтрал марцIсса дукия итадакьлакьисса фермертал ва туризмалуву зузими.
Фестиваль наниссаксса хIаллай шиккун бувкIунни 100 азарунниха ливчусса инсантал.
