Уттигъанну «Труд» стадиондалий хьунни Хъун дяъвилий Ххувшаву ласаврин хас дурсса дронну ссур даврил Дагъусттаннал первенство.
Ва сакин дурну дия дронну ссур даврил федерациялул, Аьрасатнал Машиностроительный союзрал, ДР-лул Спортрал министерствалул, ДР-лул Жагьилтурал иширттал министерствалул.
Турнир тIитIаврий аьралуннал оркестрданул рурцуну бия Хъун дяъвилул шиннардил макьанну. Аьла-ссалам буллалисса махъру лавхъунни цIа дурксса инсантурал: АьФ-лул Госдумалул депутатътурал АьбдулхIаким ХIажиевлул ва Артем Бичаевлул, Аьрасатнал дронну ссур даврил федерациялул вице-президент Александр Котовлул, ДР-лул жагьилтурал иширттал министр Камил Сяидовлул, ДР-лул Халкьуннал Мажлисрал депутат Марат Алияровлул, Машиностроительный союзрал председатель Заур ХIапизовлул ва цайминналгу.
Турнирданийн увкIунни Аьасатнал UFC-рал ию, куклумур кIушиврул чемпион Ислам МахIачевгу. Ваналгу хIарачат бунни дрон ссур дуван. Мероприятиялий гьуртту хьунни Дагъусттаннаясса сайки 100 пилот.
Турнирданул хъамаллуран ккавккунни цукунсса цIушиннарду, хьхьичIуннайшивуртту хьуну дуссарив ва бутIуву махъсса чIумал.
Турнирданул ахирданий ххув хьуминнан дуллунни наградартту–медаллу, кубокру ва миннахь дур ихтияр гьуртту хьун Ухссавнил Ккавкказуллал Федерал Округрал бяст-ччаллавух.
Ва хъанахъиссар жула республикалий дурсса кIилчинмур первенство, цалчинмур хьуссар ларгмур шинал Дарбантлив «Нарын-къала» стадиондалий.
Первенствалий гьуртту хьунни Дагъусттаннаясса, Москавлиясса, Татарсттаннаясса, Белгородраясса пилотътал.
Ххув хьусса Амирхан Таймазов гьуртту хьунтIий ур бяст-ччаллал хъиривмур ятIапрай Грозналий.
Дронну дур личIи-личIисса журардал. Ми ссур дуван лахьхьингу бигьасса иш бакъар. Хъиннува захIмат шайсса бур FPV журалул дронну ссур дуллан лахьхьин.
Леххан лавхьхьуну махъ, дрон аьркинссар салкьи дуван лахьхьингу, компьютердануцIун дазингу, настройкардай зун кIулну бикIангу. КIулну бикIан аьркинссар: республикалий, щала билаятрай кунна, къадагъа дуссар дронну ссур дуллан, хасъсса ихтияр дакъахьурча.
Мукуннугу, хIакьину Дагъусттаннай, щала Аьрасатнаву кунма, хъун хъанай бур му журалул спортрахсса гъира.
