Ккурккуллал школалий хьунни «Вместе с Россией Донбасс не сломить» тIисса, Донецкаллал, Луганскаллал Республикартту, Херсонскаллал, Запорожскаллал областьру Аьрасатнавун дурххун кIира шин шаврин хас дурсса мероприятие.
Учительтурал бувсунни оьрчIахь Аьрасатнал тарихраву ва иширал цуксса агьамсса кIану бугьлагьиссарив, вай кIанттурдайсса инсантуран цуксса захIматсса кьинирду лахълан багьссарив, кIицI лавгунни хIакьинусса кьини Аьрасатнал билаятрал хъуннасса даву дуллай бушиву тиккусса инфраструктура цIу дуккан дан, агьалинал багьу-бизу ххуй бан. — Донецкаллал ва Луганскаллал Республикарттал, Запорожскаллал ва Херсонскаллал областирдал агьулданул ккаккан бунни цала тарихийсса ватандалия – Аьрасатная ябуцан ччай бакъашиву. 2022-ку шинал Аьрасатнал президентнал ва цIусса регионнал бакIчитурал кьутIи дурссар вай регионну Федерациялул субъектру хIисаврай Аьрасатнавун духхансса. Амма хIакьину жула билаятрал душмантал хIарачат буллай бур вай регионнай дакьаву ва паракьатшиву хьун къаритан. Мунияту жунма, хасъсса аьралий операциягу баян бувну, жула билаятрал мурадру буручлан багьссар, бувсунни учительнал.
Ихтилатру къуртал хьуну махъ дуклаки оьрчIал дурккунни Ватандалухасса, дусшиврухасса назмурду, чялишну гьуртту хьунни Аьрасатнал тарихран хас дурсса викториналуву.
Андриана Аьбдуллаева