Май зурул 16-нний МахIачкъалалив, «Россия – моя история» Тарихийсса паркраву, щалвагу Аьрасатнал лагрулийсса элмийсса конференция хьунни «Динийсса ишккаккултрал Хъун дяъвилийсса Ххувшавривусса бутIа» тIисса цIанилу. Ваний гьуртту хьунни Аьрасатнавасса бакъассагу, кьатIаллил билаятирттаяссагу тарихчитал, аьлимтал, динчитал, жяматийсса ишккаккулт. Хъамал бия Москавлия, Санкт-Петербурглия, Татарсттанная, Томскалия, Челябинскалия, Башкортосттанная.
Аьмну Аьрасатнал 17 региондалиясса вакилтал гьуртту хъанахъисса ва конференциялул гьанумур мурадгу билаятрал тарихийсса ирс-ххазина буруччаврил ххуллийсса бия.
Агьамми спикертал хIисаврай заседаниялий махъру лавхъунни миллатрал политикалул ва диннал иширттал министр Энрик Муслимовлул, Исламрал культуралул, элмулул ва кIулшивурттал фондрал директорнал хъиривчу Дамир Хайруттиновлул, исламрал университетрал ректор МухIаммад МахIаммадовлул, ДГИ-лул ректор НухIкьади БахIмудкьадиевлул, Халкьуннал Мажлисрал депутат Елена Ельниковал ва цаймигу бусравсса инсантурал. МухIаммад МахIаммадовлул кIицI лавгунни дяъвилул шиннардий миллатру ва динну ца хьуну душманнайн данди бавцIушиву щалвагу Совет билаятрай. Бувсунни вава ххуллий хъуннасса даву дуршиву та ппурттувусса муфти АьбдурахIман Расулевлул. Ванал давугу так диндалуцIун дархIусса къадиркIшиву, аьрая талаталт шаппа-шаппай зана хьуннин ялугьлагьисса кулпатру аякьалувун лавсун ивкIшиву. Хъунмур заседание дурну махъ секциярттал даву дайдирхьуна Башларовлул цIанийсса Медицинский колледжраву ва Гуманитар-педагогический колледжраву. «Хъун дяъвилул ппурттуву дин ва патриотизм» тIисса секциялул модератор бия философиялул элмурдал доктор, ДГИ-лул кафедралул профессор Асият Буттаева. «Дяъви, идентичность ва тарихийсса хъамакъабитаву» тIисса секциялул модератор бия кIава ДГИ-лул кафедралул профессор, тарихрал элмурдал доктор Роза МахIаммадова.
Мероприятияртту къуртал хьуну мукьах тIутIив дирхьунни Лениннул Комсомолданул паркравусса Абадлийсса цIарачIа. Бусан ливчIунни, ва конференция Дагъусттаннал Гуманитар институтрал сипталийну дуршивугу.
ПатIимат Рамазанова
