ЦIуминалийсса ЦIуссалакрал райондалийсса Ч1урттащиял школалий апрель зурул 9-нний хьунни жагьилсса ник патриот зумуну, кулпатирттавусса багьу-бизулул кьадру-кьимат буну тарбия баврин хас бувсса республикалул даражалийсса семинар.
Семинарданул давривух гьуртту хьунни ва асар хьунсса ихтилатру бунни Аьрасатнал Ветерантурал союзрал председатель МахIарам Аьлиджановлул, Региондалул аьрали-патриот тарбия дулаврил ва аьралуннаву къулугъ буллан жагьилтал хIадур буллалисса центрданул каялувчи ХIусман Мазанаевул, «Ххувшаврил волонтертал» тIисса щалагу Аьрасатнал жяматийсса суккушиндарал каялувчи МахIаммад ХIусайхановлул, «Элмурдал чIавамур академиялул» директорнал хъиривчу Жавидин Жемиевлул, ЦIуссалакрал 1-мур гимназиялул учитель Сулайман ХIамидовлул.
Семинарданул даву ххаллилну сакин дурну дия Райондалул дуккаврил управлениялул хъунмур Светлана Къудаевал. Семинар байбишин хьхьичI школалул жанахIраву тIивтIуну бия дуклаки оьрчIал пагьму-гьунарду аьч буллалисса майданну, хьхьичIавасса багьу-бизулул, кьай-кьуйлул балгусса мюрщи музейрду ва миллатирттал дукрардал чIюлу бувсса ссупрарду. Хъамаллурал ххал бивгьунни оьрчIал захIматирттайну сакин бувсса майданну, бунни школалийх экскурсиягу.
Семинарданул агьаммур бутIа хьунни школалул актовый залдануву. СахIналия ккаккан дуллай бия 1999 шинал, ЦIуссалакрал аьрщарайн къачагътал ххявхсса чIумал, душманнайн данди бавцIуну, къучагъшиврий жанну дуллусса милицанал зузалтрал суратру, буслай бия миннал дурсса къучагъшивурттая.
Ихтилатирттал лях-карах ххаллилсса концертрал программа ккаккан дунни ЦIуссалакрал райондалул школарттал дуклаки оьрчIал. Мероприятие багьайсса куццуй щаллу шаву мурадрай, сакиншиндарал ялув авцIуну ия цува райондалул бакIчи МахIаммад-ХIажи Айдиев. Семинар тIитIлай, ванал барча бувна дуклаки оьрчIру ва учительтал, кIицI лавгуна ЦIуссалакрал райондалий ялун нанисса никиран эбратну хьунсса вирттал чансса бакъашиву.
Семинарданул лагрулий ккаккан бунни мастер-классру, дирхьунни личIи-личIисса дарсру.
Жу лавгру Гьамиящиял школалий оьрус мазрал дарсру дихьлахьисса Рашидова Шавлухълул мюрщи классирттавусса магьлул дарсирайн. «Шавлухъ Хайруттиновна пагьму-гьунар бусса, цила даву ххирасса педагогри», – тIий, буслай бия Гьамиящиял школалул директор ПатIимат Султановна. ВичIи дишин бувкIсса хъуниминнайнгума асар биян бунни ванил дирхьусса магьлул дарсирал. Хъинну ххуйну хIадур дурну дия дарсиран аьркинсса декорацияртту, оьрчIансса костюмру. Цивппа оьрчIругу хIадурнувасса артистътал бия.
Ахирданий цинявппагу семинарданий гьуртту хьусса учительтуран дуллунни пишакаршиврул даража тасттикь буллалисса сертификатру.
