Апрель зурул 26-нний хьунни хьхьичIунсса ишккаккултрал, лайкьсса инсантурал цIарду, мукунма тарихрал ишру абад баврил Дагъусттаннал БакIчиначIасса комиссиялул заседание.
Заседание дачин дурну ия Дагъусттаннал ХIукуматрал Председательнал хъиривчу Муслим Телякавов. Шикку гьаз бунни МахIачкъалаллал школалун Аьрасатнал Виричу НурмахIаммад ХIажимахIаммадовлул цIа дулаврил масъала. Виричунал цIа дулун тIий бур ва дуклай ивкIсса 42-мур школалун. Комиссиялувусса цинявппа рязи хьунни ва хIукмулущал.
ДакIнийн бутан, НурмахIаммад ХIажимахIаммадов хъанахъиссар Украиннал аьрщарай Аьрасатнал буллалисса хасъсса аьрали операциялуву цалчин къучагъшиврий жан дуллусса аьраличу. Аьрасатнал Президентнал хIукмулийну ванан аьпалул хьуну махъ Аьрасатнал Виричунал цIа дуллуссар.