Сентябрьданул 11-нний Расул ХIамзатовлул цIанийсса Национал библиотекалуву хьунни Дагъусттаннал халкьуннал чичу АхIмадхан Абу-Бакардул «Даргиял душру» тIисса луттирал презентация. Лу итабавкьуну бур чичу, шаэр, публицист, сценарист АхIмадхан Абу-Бакар увну 95 шин шаврин хасну Дагъусттаннал издательствалул. Шиву бур авторнал «Марххалттанул инсантал» тIисса кьиссагу. Вай оьрус мазрайгу, дарги мазрайгу бивщуну бур. Луттирал хьхьичIмахъ чивчуну бур Миясат Муслимовал.
АхIмадханнул оьрмулул ва захIматрал ххуллия бусласисса, ванал творчествалун лавайсса кьимат бишлашисса ихтилатру бунни Дагъусттаннал цифрардал лябуккулул, информациялул ва печатьрал министрнан кIанайсса Юрий ХIамзатовлул, «Даггосиздатрал» хъунама Азнаур Аьбдурашидовлул, Дагъусттаннал халкьуннал чичу Кьасумбаг МихIрабовлул, шаэр,таржумачи, публицист, Аьрасатнал Чичултрал союзрал Дагъусттаннал отделениялул ва Ккавкказуллал чичултрал клубрал председатель Миясат Муслимовал, Дагъусттаннал Чичултрал союзрал даргиял секциялул хъунама Муса БахIаммадовлул, Дагъусттаннал халкьуннал шаэр Аминат Аьбдулманаповал, «Дагестанский аул» тIисса музей-заповедникрал директор Зумруд Сулаймановал, Мазрал,литературалул ва искусствалул институтрал (ДФИЦ РАН) отделданул каялувчи Хизри Юсуповлул, «Зунттал хъами» журналданул хъунмур редактор Ххамис Шамиловал, «Замана» кказитрал корреспондент, прозаик ХIажимурад Раджабовлул. Мукунма чичу дакIнин утлатисса ихтилат бунни ванал маччадуш, Дагъусттаннал лайкь хьусса художник Лайла Изабакаровал.
Юрий ХIамзатовлул цала ихтилатраву кIицI лавгунни культуралул ххазинасса ирс ябаву хIакьину Дагъусттаннай хьхьичI ххуттайн ласун багьлагьисса масъала бушиву, миллатирттал литература машгьур дуллан, ялун нанисса никиравун мунихсса гъира бутан аьркиншиву.

Циняв ихтилатчитурал чIурчIав дунни ляличIисса гьунарданул заллу АхIмадхан Абу-Бакардул творчествалул Дагъусттаннал литературалул ва культуралул тарихраву яргсса лажин чирчушиврий.
Мероприятиялий гьуртту хьунни вузирдал ва элмийсса идарартал вакилтал, студентътал, даргиял театрданул артистътал.
АхIмадхан Абу-Бакар хъанай ур «Дагъусттаннал халкьуннал чичу» тIисса цIа цалчин ларсма. Увну ур ва Оьргърал шяраву. Къуртал бувну бур М.Горькийл цIанийсса литературалул институт ва СССР-данул ГлавкинематографиялучIасса сценар курсру. Зий ивкIун ур «Дусшиву» альманахрал даргиял выпускрал редакторну, Дагъусттаннал Чичултрал союзрал правлениялул жаваблувсса секретарьну, «Лениннул ттугъ» тIисса республикалул кказитрал редакторну. «Дагъусттаннал прозалул кIюрх» тIий ур ванал творчествалул хIакъираву Расул ХIамзатов. АхIмадхан Абу-Бакар хъанай ур Дагъусттаннал кинематографиялул гьану бивзмагу. 1959-ку шинал дурксса Дагъусттаннаясса ва Дагъусттаннал актертал гьуртту хьусса «Тучи покидают небо» тIисса цалчинсса художествалул фильм га цIана машгьур хьуну дур. АхIмадханнул сценариярттай аьмну 12 фильм ларсун дур.