Мартрал 11-нний Сербиянал Зренянин шагьрулий хьунни лачIунбуккултрал Европанал первенство.

Турнирданул махъра-махъмур кьини, Аьрасатнал цачIундур командалул дурххунни мукьра медаль, миннувасса шанна ларсунни Дагъусттаннал спортсментурал.
125 килорал кIушиврий яла лахъмур шачIанттуйн лавхъунни ХIабиб ДавудхIажиев (Хасавюрт). Финалданий ва ххув хьунни Азирбижанавасса Юсиф Дурсуновлуяр 4:1 счетрай. Финалданийн ияннин ДавудхIажиев ххув хьуссар Молдованал, Турциянал ва Гуржиял лачIунбуккултраяр.

Первенствалий ххув хьунни мукуна Ханты-Мансийскаллал округрахлу уклай ивкIсса дагъусттанлув Бозигит Исламгереев. Финалданийн ияннин ваналгу ух увссар мукьа лачIунукку. Четвертфиналданий Бозигит ххув хьуну ур дунияллул ва Европанал первенствардай щихьхьунчIав рай къабуллусса Франциянавасса РахIим МахIаммадовлуяр.
Аьрасатнал командалул чарвитул медальлу ларсунни чачаннал лачIунукку МахIаммад Байтукаевлул (74 кило) ва Къизлардаясса МустапахIажи Малачдибировлул (92 кило). БачIифиналданий Байтукаев ух хьуну ур Германиянал Мануэль Вагиннуяр, Малачдибиров – Азирбижаннахлу уклакисса ингушнал легионер Аьли Цокаевлуяр.

Аьрасатнал командалул лавсун бур 199 рейтинграл очко ва бувгьуну бур аьмсса зачетрай 1-мур кIану, минначIа дур 9 награда. КIилчинмур ххуттай дур Азирбижаннал команда – 170 очко. Шамилчинмур кIанай дур Арманинал команда – 16 очко.

ХI.Аьдилов