ЦIуссалакрал райондалул бакIчинал хъиривчу Рустам Сулаймановлул бувсунни Аьрасатнал Чил билаятирттал иширттал министерствалий хьусса Дагъусттаннал презентациялул хIакъиравусса пикри.

«Аьрасатнал Чил билаятирттал иширттал министерствалий Дагъусттаннал ккаккан бунни цила потенциал. Му жула региондалун хъуннасса агьамшиву дусса иш хъанахъиссар. ЧIявуминнан бикIайва Дагъусттан так шяраваллил хозяйствалуха ва ризкьилуха зузисса махъун багьсса регион кунма бизлай. Жущава бювхъунни жува ца буссарув ккаккан бан. Жула ккаккияртту ххал хьунни чил билаятирттал дипломатътуран. Жура майшан учарду, авадансса культура ва аьдатру дакъассагу, IT сфералувусса, промышленностьравусса ва туризмалувусса инновациялул проектругу. ХIакьину Дагъусттан хъанай бур хIала-гьурттуну зун хIадурсса, анаварсса бущилий хьхьичIунмай нанисса регион. Ххишаласса къулагъас дия туризмалул чулухуннайсса жула каши ккаккан даврих.

Щалагу дунияллиясса туристътал кIункIу бансса тIабиаьтрал караматшивуртту дур жучIара, зунттая хьхьирийн дияннинсса. Утти чил билаятирттал дипломатътураща цащава бусан хьунтIиссар Дагъусттанная цала-цала билаятирттай. ХьхьичIун ларсунни мукунна промышленностьрал темагу. Ккаккан дунни экологиялул чулуха марцIсса продукция итадакьаврил проектру, энергетикалул ва машиностроениялул инновациялул разработкартту. Жува ккаккан барду Дагъусттан, шяраваллил хозяйствалул продукция дулаврицIун, ттизаманнул промышленностьрал центрнугу хьун бюхъайшиву. ЖучIара гьарзат дуссар иш бавчусса хьхьичIунсса регион хьун, жува му мяйжангу бантIиссар щала дунияллун», – увкунни ванал.

Андриана Аьбдуллаева