Вай гьантрай Челябинск шагьрулий къуртал хьунни яруннан чани чанминнал дянив ка дишаврил Аьрасатнал Чемпионат.

Муний Дагъусттаннал цачIундур командалул бувгьунни цалчинмур кIану. Муния бувсунни Дагъусттаннал Спортрал министерствалул прессалул къуллугърал.
Дагъусттаннал командалул вакилталну бивкIссар 9 спортсмен, миннал дурххунни шанна мусил, шанна арцул ва шанна чарвитул медаль.
Аьрасатнал чемпионтал хьунни Жамал Чупанов, Низами Рабаданов ва Ансарияв Мусаев.
КIилчинми кIанттурду бувгьунни Аьбдулжалил Гюлечовлул, Шамил Расуловлул ва Самира Юсуповал.
Чарвитул медальлан лайкь хьунни Аьли Аьбдулссаламов, Запир МахIаммадрасулов ва Майгюл Амирметова.