ЦIяхъурдал «Нур» кказитрал редакциялий журналистътуращал хьунаавкьунни 1999 шинал Дагъусттаннайн ххярхсса бандитътурал кьюкьращал хьусса дяъвилул иширттал гьурттучи, отставкалийсса полковник Тажуттин ХIажиев.

Ва увссар Рутуллал райондалийсса Жиних шяраву, бувккуссар Дагъусттаннал мединститут, ординатура, аспирантура, хьуссар медициналул элмурдал кандидат. Тамансса хIаллай зий ивкIссар МВД-лул санчастьрал хъунаману.
Ванал биографиялуву ца агьамсса кIану бугьлай бур 90-ку шиннардий аьралуннал хIакинну зузисса чIумал ( 1994,1996, 1999 шиннардий)Дагъусттаннал Первомайскалий ва Къарамащиял шяраваллаву хьусса дяъвилул иширттаву гьуртту шаврил.
Тажуттин ХIажиевлул тIиму­нийну, 1999 шинал бандитътурал кьюкьри Дагъусттаннайн ххярхсса чIумал, МВД-лул санчастьрал медициналул зузалтрайн тапшур бувну бикIссар ччясса мутталий биян дяъвилул ишру хъанахъисса кIанттурдайн. Та чIумал полковник ХIажиев ивтун ивкIссар Къарамащиял зоналийсса госпитальданул хъунаману.
Журналистътурал суаллахьхьун жавабру дуллай, ванал гьартану бувсуна 25 шинал хьхьичI хьусса иширттал чIумал медициналул зузалтрал цукун ххассал буллай бивкIссарив жула аьра­литал.

ХIасан Аьдилов