Дагъусттаннал бакIчи Сергей Меликовлул ва АьФ-лул ГО ЧС-рал ва тIабиаьтрал апатIирттал биян бувсса зараллу бухлаган баврил министр Александр Куренковлул хьунабакьаврий ххал бивгьунни регион гъинтнил чIумул таваккуллайн (сезонным рискам) хIадурну бушиврил масъалартту.
Хьунабакьаву хьуну дур Аьрасатнал МЧС-рал бакIчи Дагъусттаннайн къуллугърал аьрххилий учIаврил лагрулий. Вания бувсунни республикалул каялувчинал прессалул къуллугърал.
Ларгсса шинал республикалий сияхIрайн лавсун бивкIссар 11 цIу лачIаврил кюру ва цIу ларчIун диркIссар 80-нниха лирчусса гектардай, 2024 шинал – бувагу ца вацIлуцIух цIу лачIаврил кюру. Шикку цIу лачIаврил тагьар ялунгу захIмат дуллай дур цIу ларчIсса кIанттурдайн биян захIматну бушиврил ва тиччалу щинал кьянатшиврул. Мукунсса тагьардануву хъуннасса мяъна дусса дур пилот акъасса авиация ишла даврил.
«Ларгсса шинал региондалий тIабиаьтран хасъсса цIу лачIавуртту ацIлийну гьарза хьуна. Мукунсса цIу лачIавуртту хьуна гьан-биян захIматсса ва щин дакъасса кIанттурдай. Ми кIанттурдай цIу ларчIний ишла дурну диркIссар МЧС-рал авиация. Кумаг буллай бия волонтертал. ЦIу ларчIсса кIанттурдай лещан дурну махъ дурсса анализрал чIалачIи бунни микку бюхъайссаксса чIяруну ишла дуллан аьркиншиву цIусса технологияртту, пилот акъасса авиация», – увкунни Александр Куренковлул. Ванал республикалул каялувчинахь барчаллагь увкунни мукунсса иширттан хасну цIусса беспилотникру ласунсса масъала гьаз баврихлу.
«Дагъусттан бур зунттал улча, цин лавхьхьусса климатращалсса, шикку тIабиаьтрал апатIругу чансса къабикIай. Амма жунма аьркинссар цила чIумал кIул дуван ялун диян бюхъайсса нигьачIавуртту, ялунгу ххуй-хъин дуван ялун диян бюхъайсса нигьачIаврия агьалинайн баян баврил система ва чан дуван агьалинайн таваккул бутаву (риски для людей). Жу ми иширттах хъуннасса къулагъас дуллай буру. Му давриву жун хъинну хъунмасса кумаг буллай бур Аьрасатнал МЧС-рал. Барчаллагь, Александр Вячеславович, кумаг баврихлу», – увкунни Сергей Меликовлул.
Миннал дурунни цIанасса чIумал регион сезондалул чIумуйн хIадур шаву ва аьямну бувчIин бунни Дагъусттаннал агьалинал ва территориярттал мюхчаншиврул даража лавай бансса чаранну.
ХI. Аьдилов
