Азарханалул зузалансса бахшиш
ЦIуссалакрал райондалиясса, чIявусса оьрчIру бусса медициналул зузала Раиса Айдиеван пишалул байрандалуцIун бавхIуну диплом ва арцуйнусса бахшиш дуллунни.
Вай гьантрай МахIачкъалалив Медициналул зузалал кьинилун хас дурсса шадлугърал мажлисрай Аьрасатнал ЦIуллу-сагъшиву дуруччаврил зузалтрал профсоюзрал Дагъусттаннал отделениялул хъунмур Зумрут Бучаевал бувсуна Дагъусттаннал ЦIуллу-сагъшиву дуруччаврил министерствалущал цачIуну цала итабавкьусса «Признание» тIисса проектрая. Кулпатрал шинацIун сакин бувсса ва проект лавсун бур личIисса номинациялийн ва микку гьуртту хьуну бур цIуллу-сагъшиву дуруччаврил ххуллий зузисса чIявусса оьрчIру бусса кулпатру. Ва кьини мукунсса кулпатирттавасса медициналул зузалтрахсса къулагъасгу ххишаласса дия.
Миннан буллуна дипломру ва арцуйнусса бахшишру. Вай лайкь дурминнавух бия, 27 шинай медициналул ххуллий зузисса, ЦIуссалакрал 1-мур азарханалул акушерка, ацIва оьрчIал нину Раиса Айдиевагу.

ТIайла бувккунни кумаг
Вай гьантрай ЦIуссалакрал райондалия хасъсса аьралий операция нанисса кIанттурдайн цал ттигу гьан бунни гуманитар кумаг. Фронтрай аьркин дагьлагьисса строительствалул ва абия дизайсса ярагъ, генераторду, муххал сеткарду ва пардав хIисаврай ишла дайсса къертту гьан дувара тIий ца частьрал аьралитал бувккун бур райондалул Депутатътурал мажлисрал председатель Аслудин Аслудиновлуйн.
Арцу датIлай чIун лахъи лаганссар тIий, райондалул депутатнал уссурвавращал архIал цала ларсун гьан дурну дур аьркинмур. Вайннущал шяраваллил жяматралгу гьан дурну дур посылкартту хасъсса аьралий операциялий гьуртту хъанахъисса цала гъан- маччаминнан ва шяравучутуран. Вай цимурца — 300 азарунния лирчусса арцунсса стройматериал ва жяматрал посылкартту, диян дан гьан рязи хьуну ур Гьамиящиял шяравасса жагьил. Ванал ппугу, уссугу аьралий операциялий гьуртту хъанай бур.
Хъунма хIал къалавгун, хасъсса аьралий операция нанисса кIанттурдая дуркIунни аьралитурал Аслудиннухь барчаллагь тIисса видео.
КIицI лаган, Аслудин Аслудиновлул ва цалчинсса кумаг бакъар аьралий операция нанисса кIанттурдайн тIайла буклакисса.

Ца ттигу ятиннан къатта ласунтIий бур
ЦIуссалакрал райондалий гьарица шинах ирглийсса ятинсса оьрчIан къатри ласлай бур. Вай гьантрай нину-ппу бакъасса ва миннал кьабивтсса оьрчIан ласун­сса къатри кьамул дайсса комиссиялул ххал дунни ласун дакIнийсса къатрал тагьар.
ХIакьинусса кьини ЦIуссалак­рал райондалий къатри ласун ирглий бавцIуну бур нину-ппу бакъасса ягу миннал кьабивтсса 10-нния ливчусса оьрчIру. Къатри ласунсса программалийн бувну, гьарица шинах 2 ятин къатрал дузал ан бюхълай бур. Му мурадрай итадаркьуну дур 3 миллиондалийн дирсса арцу.
Комиссиялул ххал бунни къат­рал документру, коммунал хIа­ллихшиннардах арцу дуллусса квитанциярду, къатрал квадратура, санузел, кадастралул ва базаллул багьа.

Медальданун лайкь хьунни
ЦIуссалакрал райондалиясса, хасъсса аьралий операциялий гьуртту хъанахъисса аьраличу Саид Габиевлун дуллунни «За образцовое выполнение воинского долга» тIисса медаль.
ЦIуссалакрал райондалиясса жагьилтуран дяъвилул иширттаву эбрат ласунми чансса бакъар. Къучагъшиву ккаккан дурссар вайннал ттаттахъал Буттал КIанттул цIанийсса Хъунмасса дяъвилий Ватан душманная дуручлай, мукунма къучагъну талай бивкIссар вайннал гъан-маччами 1999-ку шинал сентябрь зуруй райондалийн террористътал ххявхсса чIумал ополчентурал ва милицанал зузалтрал кьюкьраву.
ХIакьинусса кьини ЦIусса­лакрал райондалиясса 400 -ннийн бивссса жагьилтал билаятрал мурадру буручлай бур хасъсса аьралий операциялий. Хъунма хIал къавхьуна Саид Габиевлулгу аьралий операциялий гьуртту хьун лавгун. Цалчинсса гьантрайва цала чувшиву ккаккан дурну, ва лайкь хьуну ур личIи-личIисса наградарттан: командованиялул чулухасса грамоталун, «Хасъсса аьралий операциялул гьурттучи» тIисса медальданун. Вай гьантрай ванан дуллуну дур «За образцовое исполнение воинского долга» т1исса медаль.

Андриана Аьбдуллаева