Сентябрьданул 2-нний, Дагъусттаннал ХIукуматрал председатель Аьбдулмуслим Аьбдулмуслимовлул каялувшиврулу, дуклаки оьрчIал хьхьичI нузру тIиртIунни 7122 оьрчIансса 20 школалул ва оьрчIал багърал.
Мероприятиялий региондалул премьернащал архIал гьуртту хьуна вице-премьертал, исполнитель властьрал органнал каялувчитал, ДР-лул Халкьуннал Мажлисрал депутатътал.
Шадлугърал линейкартту хьуну махъ видеоконференцсвязьрал низамрай 15 муниципалитетрая цIусса школарду ва оьрчIал багъ хIала хьуна марафондалул трансляциялийн. ДР-лул бакIчи Сергей Меликовлул цIания лаивзуна Республикалул ХIукуматрал председатель Аьбдулмуслим Аьбдулмуслимов.
– Ва ххаллилсса КIулшивурттал кьини жунма чIалай бур цуксса ххуйсса асарду биян буллалисса дуккаврил объектру тIитIлай бурив жула республикалул 15 муниципалитетрай. Дуккавриву хъинчулийсса дахханашивуртту махъсса шиннардий хьун дуван бювхъунни нацпроектру бартдигьаврийну ва жула дагъусттанлувтурал бивхьусса захIматрайну, – куна Аьбдулмуслимовлул.
Премьер-министрнал бувсуна Дагъусттаннай дуккавриву хьусса агьамми дахханашивурттая. Ванал тIимунийну, 370 школалий дурну дур капитал ремонт ва дузал бувну бур ттизаманнул аьркинлугърал.
Агьамсса дахханашивурттал лагрулий дузал бувну бур школардай 3 сменалул масъала. 2021-2022-ку дуккаврил шинал 33 школа зий бивкIссар 3 сменалий. Азаллийсса школарду бувкIссар 5 кьинилул дуккаврил нюжмарданийн.
– Вай иширттал чIалачIи бунни цуксса мюнпат хьуссарив школардан, вайннуя буслай бур гьашинусса паччахIлугърал хIасил аттестациялул ккаккиярттал: сайки циняв дарсирдал ЕГЭ-лул дянивсса балл лахъ шаву, яла чIивимур буххьулу къалавхъсса дуклаки оьрчIру чан шаву, экзаменнал давурттал 100 балл лавсми 63 процентрал гьарза шаву, 700 даврил лавсун бушиву 90 балл ва ххишалагу, – куна премьер-министрнал.
Ванала тIимунийну, шамлий чан хьуну бур лекьан кунмасса школарду – хIакьину мукунсса школардава ливчIун бур аьмну авариялул даражалийсса школардал 7 процент. Авариялул даражалийсса школардал масъала гъансса шиннардий дузал баву – Республикалул ХIукуматрал ца яла агьаммур даврин ккаллину дур.
Яла ВКС-рал низамрай марафондалул гьурттучитурал, вице-премьертурал, шагьрурдал ва районнал бакIчитурал, депутатътурал ва цаймигу къуллугъчитурал бувсуна кIантту-кIанттурдай объектру тIитIин хIадурну бушиврул хIакъираву.
7122 оьрчIансса кIану бусса 20 цIусса школа тIивтIуну бур «Дуккаву» нацпроект бартдигьаврил лагрулий ва ца оьрчIал багъ «Демография» нацпроектрал лагрулий – МахIачкъалалив, Каспийскалий, Къизилюртлив ва мукунма Къизилюртуллал, Табасараннал, ЦIумадиял, Докъузпариннал, Къурагьиял, Казбековуллал, Нугъайнал, Сулайман Стальскаллал, Хасавюртуллал, Къарабудахкантуллал, МахIарамкантуллал ва Лаващиял районнай.
ХIадур бувссар
ХI. Аьдиловлул
