ЧIярусса гъараллал захIматсса тагьар хIасул дунни ЦIуссалакрал райондалийгу. ЦIуминалий кIичIиртту ва къатрал хIаятру щиналу лирчIунни. Райондалул бакIчи МаматIи ХIамзатов ивунни щин ялтту ларгсса кIанттурдайн, агьалинащал ихтилат бан ва хьусса зараллал хIисав-сан дан.
ХIакьинусса кьини ЦIуминалий щинавун дюркьун дур 100-нния ливчусса къатрал хIаятру. 17-ннийн дирсса къатраву щин цалчинмур зивулул лахъшиврийн гьаз хьуну дур. Шиккусса инсантал гъан-маччаначIан биян бувну бур. Циксса къатран зараллу хьуссарив мяълумну кIул бан бюхълай бакъар, цанчирча щинавун бювкьсса кIанттурдайн я машиналий, я бахьтта гьан бюхълай бакъар. Тагьарданул хIисав дуллай, чIалай бур чIяруми щин шиккун Красноармейск ва Семендер поселокирттая най душиву. Миннул гьузи лахъан дурну дур гъараллал щин дачайсса каналлу. ЦIуссаккуллал дачIи щар (ялувмур чул) щинавун бювкьун бур. Къумтуркъалаллал райондалий Караман-2 поселокрай дренажрал система ччюрклил дурцIуну, щин дуккан дан хъирив лаллай дакъар. ЦIуссаккуллал шяравалу ва Караман-2 поселок щинавун дюркьун дур. ЦIана зарал хьусса кIанттурду щинацIа ва ччюрклицIа марцI бан кIункIу бувну бур МЧС-рал гужру, ЦIуссалакрал шяраваллал бригадарду ва техника. Райондалул бакIчи тагьарданул ялув авцIуну ур. Дурсса даврия ва ляхълахъисса чаранная агьалинахь буслантIиссар.
Андриана Аьбдуллаева
