Дагъусттаннал бакIчи Сергей Меликовлул грант дурххунни чIири предпринимательствалул сфералуву («Обучение и трудоустройство лиц с ограниченными возможностями навыкам кройки и шитья») 1-мур ЦIувкIратусса Аьбдулаьзизлул арс Руслан КьурбанмахIаммадовлул. 35 шинавусса жагьилнан ччай бур цIуллу-сагъшиврул ссуссукьушиву дусса инсантуран ттисин ва дуруххин лахьхьин бувну, ми давурттал дузал бан.
Грантрал давурттал лагрулий Русланнул хIадур бувну бур Каспийскалий хасъсса помещение, ларсун дур дуруххаврин аьркинсса оборудование, ми давуртту лахьлан тIиминнал цIуллу-сагъшиврул тагьаргу хIисавравун ларсун. Шиккува хIадур бувну бур бигьалагансса къаттагу. Школардай ва жяматийсса кIанттурдай 300-нния ливчусса инсантурахь бувсун бур янна дуруххаврил касмулия. Му лахьхьин ччиминнащал бувну бур ихтилатру, мастер-классру. Даву канилух дурксса усттарнал кIи-кIия, шан-шама инсан уцлай, лахьхьин дуллай бур ттисин ва дуруххан.
Ялагу, дуруххай машиналух щябикIаннин, дарзитал хьун тIиминнан лахьхьин дурну дур мюхчаншиврул техника. ХIалли-хIаллих тIий ци-ци дунугу дурухлай, лахьлай бур. Гъинтнил зурдардий шиккун заназиминнал бурувххусса Дагъусттаннал накьичирттащалсса муму-тамур дишайсса сумкри ххуйну машай лавгунни. ЦIанасса чIумал ряха дарзи кьамул увну ур даврийн кьутIи дурну. Мастернал ляхълай ур заказру, душваран дурурххумуних буллай бур харж. Шикку дурухлай бур хялатру, гьухъри ва цаймигу лаххи-ликкия. ЦIуллу-сагъшиврул ссуссукьушиву думи ххарину бур касму лахьхьаврия, пенсиялуцIун цанна кIапIикI лякъинсса шартI дирияврия. Русланнун пикри бур ттиния тихуннай цачIара дурурххумур ттучаннай дирхьуну дахлансса. Планну хъунисса дур, хIалли-хIаллих тIий щаллу дулланссар.
– Хъунмасса барчаллагь Республикалул бакIчинан ва ттулла проект дузрайн дуккан дансса каши дуллуну тIий. На нава юристра. Хьусса цIунцIиялул коляскалийн увтунна. Ттуйнува кIулли цIуллу-сагъшиврул ссуссукьусса инсантал цукунсса захIматшивурттащал хьунабакьайссарив, – тIий ур Руслан.
ТIайлабацIу баннав, дуллалимур дузрайн дукканнав.
Андриана Аьбдуллаева
