НурмахIаммад ХIажимахIаммадовлуха

Ина був гьунарданул
Ил махIаттал бувунни,
Жандалий хIайп къакуну,
Винма бивкIу лавсунни.

Виричунал ххуллу-хха
Ина мяйжан бувунни.
Зунттал игит ушиву
Ина чIалачIи бунни.

Гьалаксса марч укунма,
Бюхттул зунттайх бивщусса,
Вил къучагъшиврул хавар
Левххунни зунттал щархъайх.

Агь, чичинтIиссар вил цIа
НякI ссавний цIурттал дянив,
Абадул лахъишиврий
Лиххан дан къабюхъайсса.

Бахттун Гъазиева

ХIакьсса виричу

Буссар ттул Лаккуй вирттал
Цаннаяр ца цIанихсса,
Къизгъинсса дяъвирдаву
Виричунал цIа ларсъсса.

Дирзсса цIанин лавхьхьусса
Шайссар учайхха арсру,
Виричу Нур — МахIаммад,
Ина му мяйжан бунни.

Бювхъусса мурхьирайри
Дюрхъу ахъулсса шайсса,
ЯхI бусса ппухълуннаяр
ЯхI бу арсру бизайсса.

Дагъусттанная бувкссар
Вирттал цIарду бюхттулсса,
Хъиннура бюхттул дурссар
Ина зунтталчунал цIа!

ГьантIиссар щюлли интгу,
ДучIантIиссар ялагу,
Вил цIа тIурча, абадлий
ЛичIантIиссар жул дакIний.

Иман МахIаммадов

Виричунан

ЛахIан ан къашайсса
Кьянкьашивруву
Виричунал гьунар
Ина бувунни.

Чурххавату дурккун,
РухI хьхьичIун дуртун,
Жалладтурал яру
МурчIи бувунни.

Вила жагьилсса жан
Ина дулайни,
Ци цIуку биявав
Ссавний бавцIуну?

Вил цIагу, гьунаргу,
ЦIарангу лавхъун,
Лакрал тарихраву
Мусих чивчуссар.

Булбул Оьмариева

Турлих тарих чивчусса

Щамхалтал чантI чин бунни,
Ханлугърайх нур диртунни,
Турлих чивчусса тарих
Хъиннува бюхттул бунни.

ПпабакIу къавтIи бувну,
Хъун-Нех аьтIутIи дурну,
Лакрал вирттаврал кьюкьа
Чанна лахъан дурунни.

Агь, НурмахIаммад, ина
Хьунаакьлай бухьунссар
НякI ссавнил пагьламантал –
АхIмад-Хангу, Набигу.

Тти цимигу аьсрулий
Вил цIагу личIантIиссар,
Муданмагу цIанихсса
Лакку улча гьаз буллай.

Ина дурсса чувшиву
Бусрав шаврил, дюххаврил,
Цув лаккучура кунни
Аьрасатнал БакIчинал…

Шалласу Шалласуев

Жандалий хIайп къакуну

ЗахIмат кьини дучIайсса
Вирттаврал бакIрачIанни,
Вирттал хъинми кIул шайсса
Мукунсса кьинирдайри.

Дурксса кьини лахъангу
Гьарцаннаща къашайссар,
Ина тIурча, лархъунни,
Жандалий хIайп къакуну.

ЧиваркI бувкссар Къяния
Буттал улклуйх цIа дурксса,
Къяннал цIа ина тIурча,
Хъиннура абад дунни.

Вирттал бувкссар чIявусса
Лакрал мюрщи щархъава,
НурмахIаммад, вил цIанил
Му кьюкьа хъунна дунни.

Бивхьуну бухьурчагу
Вил чурх тти аьрщаравух,
НурмахIаммад, вил симан
Нур лахълай личIантIиссар!

МахIмуд Аьлилов,
ш. СунбатIул

Нур диртсса симан дия

Арс ивкIу нитти-бутта
Ци тIий рахIат бувайссар?
Бутта акъа чIивитIун
Ци тIий бувчIин бувайссар?

НурмахIаммад цIа дия,
Нур диртсса симан дия.
Гьунарданий пар бия –
Циняв хIайран бувансса.

Аьрасатнал БакIчинал
Лап пахрулий увкунни:
«Нагура тти лаккучу,
Нагура дагъусттанлув».

ИвчIангу кIулсса Къайдар,
Алжаннул ххари ивуй,
Ина бюхттул буннихха
Лакку миллатрал тарих!

Вил гьунарданул гьану
Вилтталава бивзун бур:
Мархха ххуйсса бунурхха
Арс ххаллилсса лявхъусса!

Михаил Акаразуев

Ниттил цIания

Ттул арс, ттул виричу,
ттул дакIнил чаний,
Чув паракьат дави ва дакI на утти?
Вил дакIнил хъиншиву на щихь буслава,
Вих мякьнасса яру щих бурган бави?

Вил цIанил ххуйшиву, вил авуршиву
Душнивун гьантIиссар,
винма къаккавксса.
Ина лавгун мукьах вилцириннаву
Вил нурданул чани чан къахьунтIиссар.

КIяла гьайкалданий, вирттаврал чIарав
Вил цIагу хьунни, арс,
– ттул НурмахIаммад.
Цибави, ттул чаний, пахру баванна,
МикI лавчIсса чарийнгу хъямала дагьну.

Гулбика ХIажиева,
ш. Щар

ПпабакIул бакIрайгу цIа чичинтIиссар

Дагъусттаннаяту щала Аьрасат,
НурмахIаммад, ина гъалгъатIи бунни.
Вия эбрат ларсун, лакрал жагьилтал
Вил жан пида хьунийн гьан хIадурну бур.

Хъунмасса барчаллагь вил нитти-буттан,
Ялагу ххаллилсса Къяннал жяматран,
Цува лявхъу улча бюхттул бувансса
Ина кунасса чув ляхъан увну тIий.

НурмахIаммад, ина хъамакъаитан,
Вил хIурмат ва захIмат хъамакъабитан,
Вил буттал шяраву гьайкал дантIиссар,
ПпабакIул бакIрайгу цIа чичинтIиссар.

ХIусайн Давыдов,
ш.ЧIурттащи