Дяъвилул оьрчIру къабайссар, бувмигума зеххайссар учай. Зевххунни ца акъа-акъасса арс ца ттигу лакку ниттища. Пишалул бурж бартбигьлай, Донецкаллал ва Луганскаллал цIанийсса талатавриву къучагъшиврий жан дуллунни Бархъаллал шяравасса МахIаммадлул ва Саидатлул арснал Исяев Мурадлул.
Школа къуртал бувну махъ, аьрали буржгу лавхъун, гихунай контрактрай къуллугъ буллай ивкIун ур Мурад Буденовск шагьрулийсса аьрали частьраву. Ряхра шин хьуну диркIун дур микку къуллугъ буллай.

МахIаммад Исяев, ппу:
– Гьашину контрактрал чIун къуртал хъанай, шамилчинмур контракт чичин ччай уну, гьарча, шавай зана хьу, ттун чяп-чарил давурттан кумаг булланссарача тIий уссияв.
«Ца ттигу чичинна, яла зана хьунна», – тIий, мютIи ан къавхьуна.
Махъва-махъ оьвкусса чIу­мал, Къиримнал дазуй буру увкуна. Яла цичIав буслай акъая, ттун буруккин къабутан ухьунссия. Гьашину хъатIи банну, щар дуцинну тIий буссияв. Къавхьунни ттун арснал оьрчIру карав буцинсса кьисмат. Мурад гьарнан ххирасса ия. Ваная хавар бав­сса чIумал, ттухь бусан къасислай, бивк1ун бия шяраваллил жямат.

Биза, ниттиуссу:
— Мурад уссия паракьатсса, ххишаласса махъ бакъа­сса, ас-намус бусса, хъунанал хIурмат бан кIулсса жагьил. Гъан-маччанах ччаву дусса ия. Пиш тIий акъа зума къаахъайссия. Мурад оьрмулул аргъираву дунияллия лагаву кьурчIи бивзунни цинявннан. Щар дурцуну, оьрчI-душвагу кьабивтун бивкIссания тIий буру. Ци бан­ссар, аьраличунал пиша мукун­сса бур, Ватандалул тIайла бувкнийн лагайсса. Мурадлулгу, ва кунмасса чIявусса цаймигу жагьилтуралгу, цайвасса бурж бартбигьлай, къучагъшиврий жанну дуллай бур. Вай жунма абадлий дакIний бикIантIиссар.
Андриана Аьбдуллаева