[dropcap]М[/dropcap]артрал 29-нний «Илчи» кказитрал редакциялий хьунни «Имам Шамиллул фондрал» президент Аьлиасхаб Хархачаевлущалсса хьунабакьаву. Шикку гьуртту хьунни ДР-лул БакIчинацIунсса Хъунисриннал советрал председательнал хъиривчу Сиражуттин Илиясов, ДР-лул Жяматийсса палаталул председательнал хъиривчу Сапарбаг Аьбдуллаев, Дагъусттаннал жяматийсса ишккакку Рапи Абакаров.

Аьлиасхаб Хархачаевлул бувсунни гьашину республикалий лахъа-хъунну кIицI лаган най бушиву Имам Шамиллун 225 шин шаврил юбилей.
ЮбилейрацIун бавхIуну республикалий шинал лажиндарай дантIий бур личIи-личIисса мероприятияртту.

– Махъсса шиннардий Аьли­асхаб Хархачаевлул хIа­рачатрайн бувнур имам Шамиллул цIанийсса фондрал даву нирхиравун дагьсса. Ва фондрал, цила хьхьичI бивхьусса масъалартту бакъассагу, ххал бигьлай буссар Дагъусттаннал миллатирттал дянив хIасул хьусса цIурювкьусса масъаларттугу. Имам Шамиллуя, мунал виричушиврия цIа ларгссар щаллагу дунияллийх. Муная гъалгъа тIийнма бур цинярдагу аьрабнал хIукуматирттай, Туркнаву. Зувира шинал хьхьичI Севастопольлай музейравун увхсса чIумал, махIаттал хьуну ивкIра имам Шамиллул сурат дирхьу­сса, муная чивчусса реклама ххал хьуну. Имам Шамил Дагъусттаннал цIа-кьини бюхттул дурминнавасса ца хъанахъиссар. Укун­сса ишккаккулт мудангу дакIний бикIантIиссар,– увкунни Сапарбаг Аьбдуллаевлул.

– Имам Шамиллул цIа, Дагъусттаннал бакъассагу, Аьрасатнал тарихравугу лайкьсса ххуттай чирчуну дуссар. Му инсантуран тачIавгу хъама къаитантIиссар. Барчаллагь учин ччай ура фондрал давуртту чялишну дачин дурсса, хIакьсса патриот Аьлиасхаб Хархачаевлуйн. Имам Шамиллул цIанийсса фондрал культуралул ва тарихрал ирс буруччаву мурадрайсса, мюнпатсса ва ххаллилсса давуртту дачин дурну бур.

[dropcap]Ф[/dropcap]ондрал вакилтал ччя-ччяни хьунабакьай студентътуращал, бусай миннахь тарихрал дарсирдая ва тарбиялул насихIатирттая, – увкунни Сиражуттин Илиясовлул.
– ХIакьину Украиннай­сса нацистътурал режим хIасул шавринсса ца багьана хъанахъиссар тарих баххана бан кьаст лархIуми. Жула Президентнал нахIакьдан бакъар билаятрал тарихрал гьайкаллу ядаврих хъуннасса къулагъас дуллалисса. Жула цIакьсса аьдатру ва багьу-бизу буруччайсса жагьилтурал цIа мудангу машгьурну дуссар ил-аьламрайх. Дяъвилул цалчинсса гьантрай къучагъшиву ккаккан дурсса Виричу НурмахIаммад ХIажимахIаммадовгу хъанахъи­ссар мунил ца яргсса барашиннану. Мунийн бувну, жула тарихрая, жула вирттаврал дурсса чувшивурттая ялун нанисса жагьи­сса никирахь бусаву жула буржри, – увкунни Аьлиасхаб Хархачаевлул.

Имам Шамиллул фондрал президентнал бувсунни Ккавкказуллал дяъвилия ва му дяъвилий имам Шамиллул бувгьусса кIанттуя бусласисса луттирду итабакьин хIадур буллай бушиву, ми луттирдаву цачIун буллай бушиву аьлимтурал, экспертътурал, тарихчитурал цIуну ахттар бувсса кIанттурду.