Вай гьантрай Дагъусттаннал Чичултрал союзрачIасса Р.ХIамзатовлул музейраву хьунни чичу, публицист, педагог, философиялул элмурдал кандидат Аьвдуссалан Магьдиевлун ­оьрмулул 95 шин шаврин хас дурсса творчествалул вечер.

Ва барча ан бувкIун бия лакрал жяматрал вакилтал, творчествалул интеллигенция, дустал, гъан-маччами. Мажлис тIитIлай, юбиляргу, хъамалгу барча буллалисса ихтилат бунни Дагъусттаннал Чичултрал союзрал правлениялул председатель, Дагъусттаннал халкьуннал шаэр Марина АхIмадова-Колюбакинал.
Хъирив ванал оьрмулул ххуллия ва творчествалия бувсунни Дагъусттаннал халкьуннал шаэр Мирза Давыдовлул ва Дагъусттаннал халкьуннал чичу, филологиялул элмурдал доктор Хизри Илиясовлул. Аьвдуссаланнул лайкьшивурттая бусласисса, ванал захIматран лавайсса кьимат бишлашисса ихтилатру мукунма бунни Дагъусттаннал жяматийсса палаталул председательнал хъиривчу Ссапарбаг Аьбдуллаевлул, Мариян Илиясовал цIанийсса «Дараччи» ихIсандалул фондрал президент Гульшан Хасаевал, «Илчи» кказитрал отделданул редактор Андриана Аьбдуллаевал, шаэртал Бахттун Гъазиевал ва Кьурбан Кьурбановлул, Дагъусттаннал Транспортрал ва ххуллул хозяйствалул министерствалул отделданул хъунама Зиябуттин ХIажимирзаевлул, гъанчу Сайпуллагь Аьбдуразакьовлул, дустал Абрек Аьлиевлул ва Аьбдулхаликь Халикьовлул, шяравучу, гъанчу Ризван ХIажиевлул, арснал душ Тамари Магьдиевал.
Ихтилатру къуртал хьуну махъ Аьвдуссаланнул барчаллагь увкунни Дагъусттаннал Чичултрал союзрахь цала юбилейран хас бувсса ххаллилсса мажлисрахлу. Мажлис бачин бувну ия Дагъусттаннал Чичултрал союзрал председательнал хъиривчу, лакрал секциялул хъунама Супиян Оьмаров. Мероприятиялул лагрулий Чичултрал союзрал чулуха Аьвдуссаланнун дуллунни хасъсса юбилейрал медаль.
Увну ур Аьвдуссалан 1930-ку шинал Ккурккуллал шяраву. Къабигьасса диркIун дур дяъвилул шиннардийн тIайла дарцIусса ванал оьрчIшиву. Та чIумалва ккавккун бур ванан фронтран кумагран къинттуллух зузиминнал буллали­сса захIмат. «Ккурккул Буттал кIанттул цIанийсса Хъунмасса дяъвилий» тIисса цала луттиравугу ванал ккаккан буллай ур бюхттулсса ххувшаву ласун цала шяраваллил халкьуннал фронтран буллай бивкIсса кумагру. 1946-ку шинал Ккурккуллал дянивмур даражалул школагу къуртал бувну, увххун ур Гъумучиял педучилищалувун. 1950-ку шинал му къуртал бувну махъ зий ивкIун ур Кьубиял, ЧукIуннал, Кумиял, Ккурккуллал школардай. 1967-ку шинал бувккуну бур аспирантура. Зий ивкIун ур Дагъусттаннал университетраву ва Педагогикалул институтраву. 1973-ку шинал дурурччуну дур философиялул элмурдал кандидатнал цIа ласунсса диссертация. Мунияр махъ зий ивкIун ур Аьрасатнал элмурдал академиялул Дагъусттаннал элмийсса центрданий. 2018-ку шинал ванал итабавкьуну бур «Алжаннул ккурккай Ккурккул» тIисса шяраваллил тарихрая ва жяматрая бусласисса лу.
Юбилейгу барча дуллай, чIа тIий буру Аьвдуссалан Магьдиевлун цIуллушиву, ттиния тихунмайгу чичлансса гьавас ва гъира-шавкь.