Арулла шинавусса Аят ХIасанова, Сочилив вай гьантрай хьусса шахматирттай буккаврил первентсвалий мусил медаль ларсун, Аьрасатнал чемпионка хьунни. УрчIра шинавун бияннинсса душваврал бяст-ччалливу 50 душнищал данди бувккуну Аят ххув хьунни.

Шахматирттал дунияллий бур, ванил 15 шинал хьхьичI вара титул Дагъусттаннал тарихраву цалчин ларсъсса, Дарбантлиясса шахматистка Рухен Аьлиевал ххувшаву тикрал дунни тIий. Гьаннайсса, 15 шинава Дагъусттаннан зана дурну дур ванил мюрщи душвавраву яла гужмур шахматирттай буккай душнил цIа.
Жу уттинингу бувсъссия ва душния.

Аят 1-мур ЦIувкIратусса Бастамин Оьмариевлул душнил душри. Аятлул ппу Сайпуттин ЧиркIайннал шяраватусса ур. Аят цуппа дуклай бур МахIачкъалаллал ­3-мур гимназиялуву. Ва шахматирттай буккаврицIун, спортрахунгу машхулну бур, тхэквондолул ва гьузун лахьхьаврил секциярдайнгу занай бур. Дуккавривугу итххявхсса, хIарачат бусса душ бур.

Шахматирттахун багьну бур ва ххюра шинал оьрмулуву, ванил тренергу ур ФИДЕ-лул мастер Мансур Мусаев.
ДукIу март зурул ахирданий Костромалий хьусса яла гужми чIава шахматистътал бавтIсса Аьрасатнал первенствалий Аятлул 7-мур кIану бувгьуссия. 131 душ гьуртту хьусса первенствалий ва кIанугу ххуйсса хIасиллуя. Вана утти Аят жува барча буллай Аьрасатнал чIава шахматисткахъаву яла гуж бумунил цIа ласаву. Уттиния тинмайгу оьрмулувугу, дуккавривугу, шахматирттал дунияллийгу тIайлабацIу баннав, Аят! Барча буллай буру душ тIайласса, хайрсса ххуллийн тIайла бувсса ванил нину-ппу ва мачча-ляхъингу.

ПатIимат Рамазанова