Гьуртту хъанахъими:
Ччиту
КIива ччитул оьрчI
Ччиту Василий
Кьяца
ЦIуку
Ажари
Ку
АьнакIи
Тта
Хаварбусу
Хаварбусу
Тили-тили, тили-та
ХIаятрав бюхттул къатта!
ВичIи дишара, оьрчIрув:
БивкIун бур, къабивкIун бур
Дунияллий ца ччиту,
ЛичIину аьламатсса,
Махмурданул чIарасса.
Цуппагу цайми кунма,
Яхъанангу къаччисса,
ЦIихълуй уттукъабихьлай,
КIукIлусса шаний ччисса!
Цинмасса чIиви тахлий
ЯтIул виргъандалулу
Къувлул кIукIлу кIараллий
БакIгу ладикIан дурну,
Лякьа лавай багьайсса,
Неъматрай, кайпрай ччисса!
Тили-тили-тили-та!
БивкIун бур ччитул къатта!
Цинмалу цIуну бувсса!
ЧIавахьулттил нузкьунтту
Накьичирттал щарщусса.
Лагмара гьарта хIаят,
Гьар чулуха ларкьусса.
Къатлул чулух нузкьунттух
Къарал-хъунмавхьу ччиту.
Муданмасса къаралчи
Залуннал къатлул къарал!
Ххуллурдугу башайсса
Ччитул къатлул хьхьичIату,
КъапулучIа чIатулттух
КьатIухми лихъан байсса.
Вана бувкIун хъамалу
Ссийл оьрчIру, кIива ятин,
Авадан ниттилссийчIан
Ххал дуван хъамалушин,
КьутIа тIий чIавахьулттийн
Буххан битияра тIий.
Ччитул оьрчIру
Ниттирссий, Ччитушай,
Бургула чIавахьулттийх,
ОьрчIан за дукан ччай бур,
Вил маэшат лахъсса бур,
Гъили бува жу, ччитуй,
КьацI учинмур дуллуну.
Ччиту Василий
КьутIа тIисса цумару?
Ва нара кьутIатIала
Ччитул хIаятлакьура,
Хъунмавхьусса ччитура!
Ччитул оьрчIру
Жу — ччитул ссийл оьрчIруру!
Ччиту Василий
На аьппаси булунна
Зунна пряникру ласун!
ЖучIа оьрчIру чIявуссар
Пряникру гьарнан ччиссар!
Ччитул оьрчIру
Ина буси ниттирссийхь,
Жу ятинтал бушиву,
Къатлуй магъи дакъасса,
Полгу кIуллал дуркусса.
Хъякрурду дагьсса чIирттайх
Марчгу гьанай бушиву,
ЧчатIгу касак къабивтун
Танийва бувкушиву,
Укун къиялий бусса
Буси вила залуннахь!
Ччиту Василий
Букьи, бакъахьи чIатIалтI,
Барт дукан тамахI багьрив?
БацIикьай на цIанакул
ЗуцIухсса цукун байрив!
Ччиту
Щищалла гъалгъа тIисса,
Ттул къуллугъчий Василий?
Ччиту Василий
Нузкьунттух оьрчIру бия,
Дуканмур дула тIисса.
Ччиту
Нач-хIая! Муна хавар!
На чIивисса заманнай
ЧIаххуврайсса къатравун
Ччитри къабучIайссия!
Жуятура ци ччиссар,
ХIиллакарсса ми оьрчIан?
Ккашилсса ччитул оьрчIан
Приютру бур шагьрулий!
Дакъар миннаяту жун
Дигьалагру дурагу,
Неххавун бюкьан бувну,
Бири-бат бан багьанссар!
БучIанссар дустал цIана,
Нагу ххарил лехланна.
Хаварбусу
Авадансса ччитучIан
Хъамал ялун бувкIун бур:
Шагьрулий машгьур кьяца
Эц диркIсса щарссанищал,
БакI щалва кIяла хьусса
Ччанну лахъи цIукущал!
Бияй оьажаригу,
Ганищал аьнакIигу!
Ччиту
Кьяцай, Кьяцлулмаа!
На вих ялугьлайнма!
Кьяца
ХI-хI- хIурмат вин,ччитуй!
Жу ати -и-ил хьунну чансса,
Ххуллийх гъарал ларчIукун
Щинал бярдайх нан багьну.
ЦIуку
Ди, хIакьину ласнащал
Щинал бярдайх най бивкIру.
Ччиту
Ссалам Ажарий-Жарин!
Ажари
Барчаллагь !Э-оь-оь-оьууу!!!
Ччиту
Инарив ттун , аьнакIий,
Ххал шара хъинну чанну!
АьнакIи
ЗучIан занан къабигьар,
Архну яхъанай буру.
Жу, мискинсса аьнакIив,
Шаппаллил душру буру!
ЦIана ххюягу бувкIру
Зул ххаллил къатри ккаккан,
Гьарнал мазралун дагьсса!
Миннуй тамаша буван!
Ччиту
Ттул нузру тIиртIуннассар,
Вана ттул аьшвашхана,
МатахI марцI пялутралли —
Ва кIанур, щябикIайсса,
Ва усттул, за дукайсса.
Кьяца
Ва усттул, щябикIайсса!..
ЦIуку
Ва кIанур, кьурщу байсса!..
Ччиту
Зу бяйкьлай буру, дустал,
На мукун къакуссия!
Зу кIантту цан кананну?
Миннуй зу щябикIира!
МатахI дукъакайнугу
ЩябикIан ми къулайссар.
ЦIуку
ТIайламур бусан ччарча,
Жу кьяцлущал цаллагу
Усттулданух щябивкIун
Дукрарду къадуркуссар!
Ахттайнссагу ахъуву,
Гьартанийри жун ччисса!
Ажари
Муниятур зуяту
Оьккину гъалгъа тIисса!
(Ччитухь)
Цумур къатлувунссари
Ва урчIахуннайсса нуз?
Ччиту
УрчIахунмай – ишккапри
Ттулла янна лаххайсса,
Куяхмур – тавханари
Тушак ва тах бивхьусса.
Ажари
(лагьну аьнакIухь)
Бургула! Къувлул шану —
марцIсса къув!
АьнакIи
(лагьну )
Ажарий! Ванил жула оьрчIру бацай!
Кьяца
Тти вагу цир?
Ччиту
ЦIушинна —
Чаннаннил кIуллукъатIа!
Ттун кIулли бугьлан къаччир,
На ми къатIух бугьара.
Кьалакьи ялун дагьссар,
КIулу къатIул бувгьуссар!
Ттул буттал улклуй ччитри,
КIулли бугьайсса бакъар.
На – хьхьирил тихассара,
Ттул ттаттагу – Ангорский!
Лахъи, Васяй, хъун чани,
Ккаккан да ганал сурат!
АьнакIи
Парх икIаву!!
Ажари
Ххуй икIаву!
Ччиту
Ттуха цахъис лащин дур!
Вагу ттул ттяй-тавханар
Шивун хъамал буххайссар.
Халичартту, дагьантту.
Пианиногу ласав
Ца маша бай ттуккуща.
Инттурив гьарца кьини
Балайлул дарс лахьхьара!
Кьяца
(ЦIукухь)
Бургулагъар дагьанттах!
Гьарцанниву кьяца бур!
ЦIуку
Ми яруннийх ка дукки:
Цинявннуву цIуку бур!
АьнакIи
Бакъар! Ци цIуку тIийра!
Шикку буру анжагъ жу:
Ажари ва АьнакIи!
Кьяца
ЧIаххул, танийн бикIанну,
Ва нахIакьсса бяст буллай?
ХIурмат бусса хозяйкай,
Учала жун ца балай,
Музыкагу бивщуну!
АьнакIи
Вищала ажарттулгу
Учин бувала балай.
Пахру буллан къаххуйри,
Амма ажарттул чIу бур
ЛяличIину тIааьнсса,
ЩихачIав къалавхьхьусса.
Ажари
На балай кIюрххил чара,
Ххануяту бучIаннин
Зун муксса ччай бухьурча
На зущалгу учинна.
Кьяца
Мунихра ялугьлайсса,
Итабакьира балай
Лавгзаманнай кунмасса:
«Ца багъраву, ца хъюву,
Каландалул ахъуву»!
Ччиту
Мяв!Мяяяв! ДуркIунни хьхьу.
Пар тIий бур цалчин цIуку!
Ажари
Ина чун бакъа хьура?
Э-оь-оь-оьууу…
Къюд- къудаааа?..
ЦIуку
(кьяцлухь, хIаллих)
Ил, авлияй, къуртал хьу
Залуннал тIутIи дукуй!
Кьяца
(лагьну)
НахIушиву! Ххал дувала!
Каландалул чIапIи хханссар.
Вана ттигу ца къячIи
Дуки виннагу тIутIи!
Ажари
(эоьлий )
Ина чун бакъа хьура?
Э-оь-оь- оьууу…
Къюд-къудааа?…
Кьяца
(тIутIивгу кьюлтIа тIий)
Хъинну ххуйри! Браво! Браво!
Учайсса иштахIну зу!
Учара ца уттигу!
Ччиту
Гьассар балай! Бачи къавтIун
Лахъанна радио на
Циняв архIал къавтIунну!
Циняв къавтIун бикIай. Цакуну ччитул оьрчIал чIурду баяй.
Ччитул оьрчIру
Ниттирсси Ччитушкай,
Бургукьай шихунмай!
Буххан бити хьхьу рутан,
Тахлий ца шану лахъан!
Агар тах бакъахьурча,
Гьари жун щяв лурссагу!
Исккамейкалий, пачлий
Чув-бунугу ца мурцIний.
Утту бишинну щявгу,
Ялун цIихъагу бувтун,
Рязийссару жу ччиний,
Ниттирссубашка Ччитуй!
Ччиту
Василий, дути пардав!
Ябивхьу чIавахьулттийх!
КьатIув цIан лакьлай дурча,
ПалцI дува даркку аьсав!
Дири укку, майлул чирахъ
КIива лахъи вацIана
Аьшвашханалувува.
Яла пачгу кIириба!
Ччиту Василий
Бачияра! ХIадурссар!
Ччиту
Барчаллагькьай Васенькай,
Ттул гъутIла гъутIай, къутIай,
Зу, дустал, лагма лаги!
ЛякъинтIиссар гьарцаннан
ПачличIа гъили кIану.
Гъараллу ва марххалтту,
Ци ххайру, миннуягу
Жунна хъис нигь дакъассар
ПачличIа къутI бикIайхту!
КьутIа тIутIувча гъарал,
Буллалувча марххала
Гьанагьувча гийх замгьар
Хъис балаллий бакъара!
Бачи магьа ляхъан бан!
Кьини дялахъан дуван!
БайбишинтIиссар Кьяца,
Ганил хъирив Ажари,
Ажарттул хъирив ЦIуку,
ЦIукул хъиривгу дунгъуз.
Яла махъ яржа жуйри:
Ажарттуй ва АьнакIуй!
(Кьяцлухь)
Гьу, байбихьу!
Кьяца
…БивкIун бур, къабивкIун бур ца заманнул заманнай ца кьяца…
Ажари
Къалмуйн къеп тIий…
ЦIуку
Калан канай…
АьнакIи
Ца заманнай ккунук бувна!
Ччиту
Лавгуна кIулли бугьлан…
Кьяца
Кьяца?
Ажари
Ажари, къакьяца!
ЦIуку
Бакъар, бакъар, цIукур!
АьнакIи
На кунмасса аьнакIи!
Ччиту
Бакъаар, му ччитур, ччитур!..
Кьяца
Дустал, кьабагьи, бацIи
КьатIув цIан ларкьун гана!
Ххуллийн багьан аьркинни
Хозяйка бигьа лаган!
АьнакIи
Дияча хъамалушин!
Ажари
Ххуйшиву ччиттул къатлул!
АьнакIи
Ванияр ххуйсса ужагъ
Бакъахьунссар дунъяллий!
Ажари
Ххуйри аьнакIул къатта!
Кьяца
НахIушиву тIутIалгу!
ЦIуку
(лагьну)
Агь, авлияй, кьаикIу!
АьнакIи
На зуйн хъамалу оьвчин
ХIадурда арвахIкьини,
Ахттайнссаннун хъахъу бур,
Жул аьнакIул къатлуву,
Яла ххануйн лавкьуну
Жува шанул ккик чинну!
ЦIуку
Жугу зуйн оьвтIий буру
Тталат кьини, ахттакьун
Ссят ряххунний хъамалу,
ЦIукул барта ххал дуван
Кьюнукьи ва капуста
ХIала бивчуну бувсса!
Ява дакIний битира
Жу зух ялугьлайссару!
Ччиту
Чара бакъа бучIанна
Шярайх къаххиранугу,
КьатIув нажагь буккайсса
На хъама мабитари!
Ажари
ЧIаххув душ, тти ивчIаннин
На вил лагъра, миннатри,
Ттуйн вих хьира, на вилла!
Лечланна так вил лагма!
Ччиту
Цалсса тти барчаллагь зун!
Ххуйсса дуссухаллихлу!
Хьулухун биянцIакул
Хъамал тIайла букканну!
ЧIурду
(чурттурдая, яла хIаятрава)
– Мугъаятну бучIлачIи,
Чурттурдайх ччех къабикIан!
Кия чулух кьакьа дур:
УрчIахунмай бачира!
– Барчаллагь зун бувкIунтIий,
Бигьалавгру лап ххуйну!
Цалсса! Хъинну бикIи тти!
Сант дагьайхту, булухьхьи!
Хаварбусу
Хозяйка ва Василий,
Хъунавхьу ссирссилттучий
ТIайла буклай чIал хьуна
Хъамал дарвазалучIа.
Мукъул хъирив махъ хъанай,
Ихтилат лахъи лаглай…
Шаппарив пачлил хьхьичIсса
Халича ччучлай, ччучлай
Пачливату цIу дагьну.
Цаппара хIал лавгукун
Куклусса цIарал лама
ТIаннуцIухгу кIивуна.
ЧIирттай чIирайхдахIултрайх,
Яла усттулдануцIух
ЛарчIуна цIу ягинну.
Мусил хъаттирду дусса
Найрду кунна ппив хьуна
ЦIараяту кIалайрду…
Зана хьуна Василий,
Ганал хъирив ччитугу
Вев-гьарайлул чIу хьуна:
— Пожар! Жу ччучлай буру!
Тили-тили,
Тили-тили,
Тили-тили, тили-та!
Ччучлай бур ччитул къатта!
Ччучлай бур ччитул къатта!
Бадрарду щинал ххилай
Булувкьунни аьнакIи
Пащагу тIий ттуршащал
Ххяхлай най бур ажари.
Дунгъузрал карчI гьанай бур
Гьанагьи дурну кIурчIлу,
Кьяцамур цан буссарив
Панар – мукьах рирщуну!
Тили-та!
Тили-та!
Гьай, цIу лещан дай кьюкьай Хаварбусу
Аман, дири буккикьай!
Ац -ацIа чутну ххяхлай
ЦIаран бувара дарман!
ЯхI бара, хъит учара,
Кьаллу щинал буцIира!
Тили-тили-тили-та!
Ччувччунни ччитул къатта!
БацIу, дунгъуз! Я, цIукуй!
Яру пIяв бивтсса циру?
Ххилаххира бадрарду.
ЧIяйкъягъри
ЦIу ссах лещан дуллаву
Щинах жу чув луглагаву?
Вин кIуллив, ил, нувщакуй
Щин гьаз дай кран чув буссар?
Ттал хIайван, ратI чув дуссар
РатIнил бава чув дуссар?
Тта
Зуманив яхъанайсса
Жун ми затру ча кIулссар,
РатIгу дусса-дакъасса,
Янин тачIав къаккаркссар!
ЧIяйкъягъри
Вайннуя пайда бакъар
Дирирмунищал бувксса,
Гьай, къундузрув, зузира
РикIру щурущи дара.
Кьукьлай тталлу, кьатIбара
ЦIарал лама бас бара
Акъарив ччитул къала
ЧчуччинтIиссар сун кунма!
Къундузру
Жу чапарду ппив дуванну,
Аьрщарай цIу лещан данну,
ЦIарал аждагьа ппив хьун
Къабитанну къудур хьун!
Ччиту
БацIула, къужай къундуз,
Чапар циванни гъагълан,
Чапардалсса къабуллай
Къатта ххассал бувара!
Жул лаххи , дагьантту,
Лув бишай кIантту, тахру
ЦичIар ччуччин къариртун
Ххилаххияра шиккун!
Къундузру
Хъуслилсса бай сант дакъар
Къавхьуна тIар ххассал дан.
Зулва бакIру ххассал бан
Ччитрий, букки цIарава!
Магъуйсса чIавахьулттийх
ЗункIуллай зурчIай тIутIи
Яла чIамуцIун лачIлай.
Ака бара ялавай!
Ччиту
ХIайп парснал бартбисуртту!..
Къундуз
Анавар хьу! Ттала багьай,
Бартбисуртту кьабити,
ЦIарал вицIухсса бувай!
Хъунмавхьу къундуз
Да, лихъира! Магъи дагьай!
ЦIуку
Ци тIий ура? Зат къабаяй!
Кьяца
Бири-биривнийн лихъира!
АьнакIи
Къеркъи- къеркъи- къеркъидаш!
Бала,бала!..Бала ххал ба!
Ччитул къатта лекьай
Ажари
Ав-ав, левкьунни къатта!
Кьяца
Вав-шав, ччурччунни гьарзат!
Ччиту
Утти чувру яхъанан?
Ччиту Василий
Ссайнна на къарал буллан?..
Хаварбусу
Оьнкьурал, кIуврал дянив
Агьи тIий, аьтIий бур ччиту,
Бакъассар тти къатта-къуш,
Я хIаят, я бартбису,
Лув бутансса цIихълул хъис
БакIрацI бишин кIаралу.
Ччиту
Агь, Василий, Василий!
ОьвтIий бухьувкун гьаннув,
АьнакIал къатлувун тти,
АжарттучIан хъамалу?
Тайннал шану къувлулли,
Къув вин къакъулайнугу
Къувлул шану- къувлулли!
Ччиту Василий
Гьанну, гьантта бикIанну
АьнакIал тавханттуву!
Хаварбусу
Ххуллийх най бур щукьгу тIий
Аьрчча ччиту Василий,
Гамур ччитугу архIал
Ххяппул ххяппа дургьуну.
ЧIавахьулттийсса чаннайн
Явш бивтунни мюрш яру…
«Шикку бурвав яхъанай
Ажари ва АьнакIи?»
Шикку-шикку бунуккар
ОьрчI-ажарттал «эоь» бур!
Ччиту
Вав-шав тIував, аьнакIий
ДакI цIуцIисса чIаххувщар!..
Жул къатта-къуш ччувччунни!
Мина тти жу чув дайссар?…
Нава, Василий-ччитул?
Битикьай жу вичIанма,
Вила аьнакIул къушлийн!
АьнакIи
Гьаксса ххари хьувияв,
Битавияв жучIава,
Хъамал бувкIсса кIул хьурчан,
Лас сситтул щаран икIай!
Махъ бувчIин бан къашайсса
Кохинхиннал Ажари…
Ччаннайсса кьурттах бурги!
Ажари
Ко-ко-ко! Эь-оь-оь!
Дакъассар дигьалагру!
АрхIал утту бишара,
Ажарттащал бизара.
Янийн я къалакьара,
Хьхьунил лякьлувугу ттун
Балай чин багьай цалчин.
Дахьва яру лакьайхту
Чани хъяхъа тIий лякъай,
ЦIанчаннаву шамилчин
Бала-гьалай тIун багьай
Кьинибархан ттун, къужлун,
Ччаннай авцIусса авцIун….
Игьалагансса мутта
Бакъассар, агь, вил къаттай!
АьнакIи
Ттул Ажарттун сси бизай,
Танин за гужну баяй,
На цамур аьнакIущал
Къабитара хавардай!
Ччиту
Яр, циван оьвчав туну,
АрвахIкьини ина жуйн?
АьнакIи
Оьвкуссия хъамалу
Гьантта бикIан къачавхха!
Ялунссаннун хIакьину
АрвахIкьини дакъархха!
ЖучIа къумашиву дур,
АьнакIул оьрчIругу дур,
ЧIаважагьил ажартту
Биллай, талай, къянк-къюнк тIий,
Бархан бикIайссар ччалли,
Хьхьувай шанан къабитлай.
ЧIун къадуркIна «эоь» тIий,
Кувннал кув батлай, ччалай!
ОьрчI-ажартту
– Эоь-оь-оь! Чутту багьмур баттила!
– КьабакIгу ппив дувала!
– Эоь-оь-оь!! Къеппа бища!
АьнакIи
Агь, оьсса зулмукартал!
Ява, ччитуй, ака ба!
Вай биллай байбиширча
Вингу, ттунгу бакьай бай!
ОьрчI-ажартту
Да!!! Бугьияра ччитри!
Ппив-ххив дан ччитрал магъру.
Биттара миннуя къув!
Ца къабивтун ппигъурду!
Хъирив булара хъахъу,
Ххуллухъиндаран ххуллийн!
Ччиту
Цир байсса, аьзиз Васяй,
Ачу лихъанну шичча.
АьнакIи
Кьяца ва цIуку бусса
ЧIаххуврачIан кьутI уча!
Ччиту Василий
Агь, оьлусса иш бурхха
Къатта бакъаний занан,
ЦIансса кучардайх буклан!
Хаварбусу
Василий-ччиту гужрай,
Хозяйкал ка дургьун най,
РатIничIа, ца бакIуйсса
Бухсса къатлучIан бияй.
Къатрал хьхьичIгу тIуркIу тIий
ЦIуку ва кьяца ккаккай,
Бястлий картардай буклай.
Кьяца
ЦIукуй, вил аькьлу чуври,
АцIунних ттуз баттайрив?
ЦIуку
Гъур-гъур цир, ссанчIавакъуй?
«Бубновыйлул» ацIунних ттузгу баттан бучIиссар,
Му жулла «козырнойссар».
Кьяца
Бубны дуссия цакьни,
Ттисса козырду-ххачрур!
ЦIуку
(гьагьру бигьлай)
Миннущала бат хьу тти,
ШацI хьунна тIуркIулия
Шанугу бахчуну бур,
Навагу бувххун бура…
Кьяца
Байбишинну цал ттигу,
Авлиятурай буклай,
Цума личIайрив, бачу
Авлияну, бази дан.
ЦIуку
Картарду дакъанугу
Ттун укунмагу кIулли!
Кьяца
Лагь хьу! Вай хъиртту щунна!
ЦIуку
Вил чIири лахъисса бур,
Хъирттурив къаххявххун бур.
Ттулми кIилийну лахъир,
ВицIухсса бан байлну бур.
Ччиту
(кьутIа тIий бур къапулух)
Заллухърув, нуз тIитIара,
Жу буххан битияра!
На чIаххув ччиту бура,
Василийгу архIал ур.
Тталаткьини зучIанма
Хъамалу оьвкунахха,
Ссавур дакъа, уттива
Буру зул къапулучIа!
ЦIуку
Хъинсса хьхьу зун! Ххарира!
Ци аьркинни, бусира!
Ччиту
КьатIув – гъарал, марххала,
Гьантта бикIан битира!
ЦIуку
Тах бакъар жучIа зунсса!
Ччиту
Нухьхьайгу жу чул байссар
Жун ца мурцIу гьа хьунссар!
ЦIуку
Зу кьяцлухьгу цIуххара,
Хъиртту бакъанагу ва
Хъинну оьсса заллурхха!
Ччиту
Ци чинна жухь, чIаххучу?
ЦIуку
(лагьну)
Зун кIантту бакъар уча!
Кьяца
ЦIанакул ттухь ттул цIукул
Зун кIантту бакъар кунни,
Хъиртту ванилми хъунир –
Бяст буллан ттун къубучIир.
ЦIуку
Хъярч бунни чIиричийнал!..
Къаттамур къумассар жул!
Ччиту
Банмур бакъар Васенькай,
Ачу гьанну кьутI учин,
Шамилчинмур къатлувун!
ЗахIматшиву оьрмулул
Магъи дакъаний ялув!
Хьхьурду хъинну! Жу лавгру!
ЦIуку
ЦIуллушиврий битаннав!
Ччиту
Ци банну тти, Василий?
Хьулийн гъан хьун къабивтун
Зана бунну дустурал…
Ччиту
Агь, Василий, Василий
Вайнналгу къабивтунну.
Бухханнин лагма бувкру
ЩилчIав кьамул къабунну!
Ччиту Василий
Тана тийх ца пукьа бур,
ЧIивисса бур, цIангу дур.
Ялун бурган мискинсса,
Аьрщаравун бювкьусса.
Цу урвав та пукьлуву,
Лагьсса чIиви пукьлуву,
Буххан битарув ккаккан
Цал ттигу миннат банну!
Хаварбусу
Тана ххуллийх най, щукьтIий,
Аьрчча ччиту Василий,
Гамур ччитугу архIал
Ххяппул ххяппа дургьуну.
Ххуллу бур бакIъялавай
Зунххи лечин багьлайсса.
Ччитун хавар буривав
Пукьлул чIавахьулттичIа —
КIира-кIира ччитул оьрчI,
КIира-кIира ччитул оьрчI
КъутI-къутI диркIун душиву.
Мюрщултран цурив нузайн
КьутIа тIий усса баяй.
Ца ччитул оьрчIал чIу
Цума уру кьутIа тIий?
Ччиту Василий
На, ччитул хIаятлакьу,
Зухь миннат буллай ура,
Битиракьай жу буххан,
Марххалттая ххассал бан!
Ччитул оьрчIру
Агь, Василий, инарав?
Вищал ниттилсси бурив?
ЦIан лакьиннин жуния
КьутIа тIий бивкIру зучIан.
КъатIиртIуна нуз ина
ХIаятлакьуй, кьунну жун.
Ччиту Василий
Бакъассар тти му давран,
Лакьин хIаят дакъассар.
Тти на къатта бакъура…
Ччиту
Багъишла битира на
Тахсир хьуну бухьурча
Ччиту Василий
Жул къатта-къуш ччувччуссар
Гьантта бикIан битира!
Цалчинмур ччитул оьрчI
КъаччанбикIру, рихшантру
Хъама ритан хIадурда.
Так шярайх буккай ччитран
БацIайсса кIантту буссар.
Ччиту
Миккун биян хIал бакъар,
Мурчал зурзутIи бунна!
Ччиту Василий
Тиккунсса ххуллул манзил
Так мукьра километрар.
Ччиту
КутIамур ххуллийхвагу
Къабиянссару тиккун!
КIилчинмур ччитул оьрчI
Хъунма уссай, ци чинна,
ТIитIививкьай дарваза?
Ччиту Василий
МукIруссару, махъунмай
Бачин гъирагу бакъар…
Цалчинмур ччитул оьрчI
КъабучIир магъи дакъа,
Гъараллу ялун найни,
Марххалтту буллалийни
Къашайссар къатта бакъа.
Гьантта икIан ити тIий
Цаманахь миннат бувнан,
ДурчIинхьуви тти чил дард.
КьатIув ливчIнал хажалат.
Щин иттишиву кIулнал,
Дякъил гужлил ццихь кIулнал,
Къаитайссар ххуллулсса
Ялув магъи дакъа гьич!
КIилчинмур ччитул оьрчI
Жул къатта къарцинсса бур,
Я лахъан пач бакъассар,
Ялув магъи дакъассар,
Пол кIуллал кьуркьу дурсса…
Ччиту Василий
ОьрчIрув, мукьунналагу
ЦIу буккан банну къатта,
Пачгу буванна нава,
ТIаннул усттаргу нава,
КIуллайнгу – авчи нава!
Ччиту
На нинушиву данна,
Барт дущан лахьхьин банна,
Хъинну кIулли бугьланна,
Мазрах тIахни шюшланна,
Битиракьай жу буххан!
Цалчинмур ччитул оьрчI
Ина лихъан къабанну,
Къумашиву дунугу,
Мискиншиву дунугу,
Хъамаллурансса кIану
Чара бакъа лякъинну!
КIилчинмур ччитул оьрчI
Бакъар жучIа кIараллу
Дакъассар виргъаннугу,
КунначIан кув лякIинну
Гъилину бикIаншиврул.
Ччиту
Куннивун кув лякIланнув?
Мискинтал, ччитул оьрчIрув!
ХIайп, жу зун къабуллусса
Танийва ми кIараллу…
Ччиту Василий
Къабуларду тахругу
Я къувлул шанурдугу …
Цуксса бучIи хьунссия
ЦIана ми аьнакIул къув!
Лиргьунни зул ниттилссу,
Нагу инжитну ура,
Лякъиннув гьанттайнссаннун
Букан ччатIул ца парча?
Цалчинмур ччитул оьрчI
Вана ччатIул макьара,
Ккаши ххиян букира!
КIилчинмур ччитул оьрчI
Вана зун щинал бадра.
БуччинцIакул хIачIира!
Ччитул оьрчIру
(цачIу)
Къумашиву дунугу,
Мискиншиву дунугу,
Хъамаллурансса кIану
Чара бакъа лякъинну!
Ччиту
Шану бахчусса гужну
Щукру, лявкъунни къатта.
Дустал, зун хьхьурду хъинну!
Тили-тили… тили… тун!
(Шанан бикIай)
Хаварбусу
Тим-та! Тили-та!
Буссия ччитул къатта!
УрчIах, куях – ларзурду!
ЯтIулсса чIултти бусса
ЧIавахьулттил нузругу
Накьичирттал щарщусса.
Тили-тили-тили-та!
Ччувччуссар ччитул къатта.
БивкIсса кIану бакъассар,
Къатлул аьш-бакI дакъассар.
Ччитумур сагъну бур тIар
ТIарду бакъа къаливчIссар!
СсийлминначIа ичIува
Мина дирхьуну бур тIар
КьатIувгу нажагь бакъа
Къабуккай тIар пукьара.
Хьулухун къабуккайсса
Шаппаллил душгу хьуну,
Кьуруву кIулли бугьлай
Мюрщи оьрчIру ябуллай!
Хъунмавгьу ччитугу тти
Аькьлу лавхьхьун бусса бур,
Цамур хьуну бусса бур:
Дяхтта даврийн занайсса,
Хьхьувай авлий буккайсса!
Кьинибархан мюрщултран
Балайрдугу учай тIар,
Ятинталгу ччитуяр
Хъунисса шавай бур тIар.
Мукьуннан къумашиву
ДикIанссар ца пукьлуву
ЦIусса, гьартасса къатта
ЦIунил буллан багьанссар!
Ччиту Василий
Чара бакъа, чара бакъа
Буванну цIусса къатта
Бавкьуну, мукьагу зий
Мукьах ришлай мяр-тIама!
Ччитул оьрчIру
ЦIувцIу тталлу бихьланну
Кьюкьрай кьану, усттарну!
Ччиту Василий
ХIадурссар даву. Утти
Чуртту буван ливчIунни,
Гьа, нузругурхха дусса
Дишинну ххуйра-ххуйсса!
Ччиту
ЧIавахьулттал нузкьунтту
Накьичирттал щарщусса.
Цалчинмур ччиттул оьрчI
Вана пачгу, бургъугу!
КIилчинмур ччитул оьрчI
Ларзнинсса кIира ттарцIгу
Цалчинмур ччитул оьрчI
ЛакьинтIиссар магъигу
КIилчинмур ччитул оьрчI
ТIаннул кIюла тахтарду
ЧIирттал ялтту дакьинну
Ччиту
Хъякрурдугу дащанну
Паммалул цулхъри дурну!
Циняв
(архIал)
ХIадурссар цIусса къатта!
Ччиту
Гьунттийва барачатну
ЦIусса къатрайн бизанну!
Ччиту Василий
МахIлалун байран данну!
Циняв
(архIал)
Тили-тили-тили-тун!
Бачи цIусса къатравун!
1
