![](https://ilchi.info/wp-content/uploads/sites/11/sites/11/2024/08/5fdf9a62-6121-40e0-b42b-06ce90e4dbf6.jpg)
Ларгсса ххуллункьини Щардал дунни Шяраваллил кьини.
Ппухълуннал аьдат-эбадатру лайкьну дуручлачисса, лявхъу мина ххирасса агьлу бушиву цимилгу тасттикь бунни Щардал жяматрал. Уттигъаннугу щарнил жагьилтурал, арцуйнусса ка-кумаг баву къахIисавну, шяравун щин дуцлай буллалисса захIмат ккавккун, жу, махIаттал- хIайран бунну.
Буттал кIанттуя архну ялапар хъанахъисса халкьуннал агьаммур мурад, жямат цала мархрая ябуцан къабитаншиврул, шинай цал-бунугу, цачIун батIаву хъанай бур.
Ва кьинигу «Щара-Арена» цIунилгу уттава бувккун бия, къавтIисса жагьи-жугьултрал, тIуркIу тIутIисса оьрчIал тяхъасса чIурдал ларсун най дия шяравалу. Балайрду учин, тяхъашиву дуван мажлисрайн оьвкуну бия балайчитурайн .
Авадансса дия байрандалул программа. Спортрал тIуркIурдаву ххув хьусса оьрчIан дуллай бия Екатеринбурграй заказ дурсса медальлу ва бахшишру.
Жагьилталгу, щарнил жяматгу барчаллагьрай бия Шяраваллил кьини кIицI лаган сиптачиталну хьусса Мирослав Ибрагьимовлуйн ва МахIаммад Сагидовлуйн.
– Хъинну ххарину ура цIунилгу ттула шяраваллил агьулданущал хьунаакьин бюхъаврия. Жува бавкьуну, куннал кув бувгьуну къуццу буллай буну тIийри шяраву давуртту дузрайн дуккан дуван бювхъусса. Жяматраву цуя-ца инсан акъар дуллалимунивух гьурттушинна къадурсса. Амма шикку личIинува кIицI лагавияв, цала мажал бакъашиврух къабурувгун, жяматрайн багьлагьисса гьарца иширай дакI цIуцIаву дуллалалисса Щардал шяраваллил СПК-лул хъунама Исмяил Бургуевлул ва ишбажаранчи ТIагьир Сулаймановлул цIарду.
Шяраваллил фондран арцу датIлатIисса группарду бур арамтуралгу, хъаннилгу бувну. Шяраваллил кьини дуллалисса ппурттувугума цIухлайнма бия, ссал кумаг бави, ци аьркинну дур тIий. Буттал кIанттуя, Лакку билаятрая арх буцансса ихтияр щихьчIав дакъассар. Укунсса байранналли жямат цачIун байсса. ХIакьину шиккугу исват хьунни инсантал куннащал кув хьунабакьин ххуцI хьуну бивкIшиву. Барчаллагь учин ччай ура байран сакин даврил масъалартту цала бакIрайн лавсъсса, Тюменнай хIакин стоматолог-ортодонтну зузисса МахIаммад Сагидов бакIчисса жагьилтурайн, – увкуна Мирослав Ибрагьимовлул.
Мажлис цила зумуну чIюлугу, тяхъагу бувна Щардал шяравасса, жунма цинявннан ххирасса лаккудуш, унгу-унгусса патриотка ПатIимат Аьлиевал. Шиккугу ва цила ихтилатраву, ужагъирттай лакку маз ябувара, буруччара тIий леххаву тIийнма бия.
– Буттахъал аьрщарайн бувкIун, жямат цачIун буллалисса байранну даврил мурад, мазгу, культурагу ядаврил цIанийссар. Ххарину ва пахрулий бура жула шяравалу цIулаглай душиврия. Барчаллагьрай бура шяраву дурсса давурттавух мискьал дунугу гьурттушиву дурсса инсантурайн. Щала Аьрасатнавух ппив хьусса Щардал агьлу лажин кIялану буттал шяравун букIлансса кьудрат дулуннав! – увкуна ванил.
Укун яхI-къирият дусса жямат буссаксса, вихшала цIакь хъанай дур шяравалугу, Лакку билаятгу уттава буккантIишиврийнсса.
Имара Саидова