Февральданул 21-нний кIицI лагайсса Ниттил мазрал кьинилун хасну МахIачкъалалив яруннин чани бакъаминнансса Республикалул хасъсса библиотекалий хьунни «Буруччара ниттил маз!» тIисса цIанилусса шадлугъ.

Мудангу уку-укунсса байраннай, кьинирдай кунма, ва ххуллухьгу шикку баллай бия личIи-личIисса мазурдий ккалаккисса назмурду, учалартту ва лувлякъуртту, Дагъусттаннал халкьуннал хъатIал, хъамаллурал (куначествалул) ва цаймигу аьдатирттаясса, багьу-бизулиясса хаварду. Вайгу – библиотекалул зузалтрал цалва буккултран хIадур дурсса миллатирттал личIи-личIисса дукрардащалсса ссупралух, ца хъунмасса кулпат кунма бавтIун.

Ниттил мазурдиясса, миллатирттал культуралиясса, багьу-бизулиясса ихтилатирттал лях-карах ВОС-рал (Всероссийское общество слепых) Культуралул къатлул гьурттучитурал щаллу буллай бия цалва-цалва мазурдийсса балайрду.

Бадрижамал Аьлиева