Елкалул байрандалия махъ, райондалул администрациялул актовый залдануву хьунни «Ёлка желаний» тIисса щалагу Аьрасатнал ихIсандалул акция.

Ванил лагрулий хьунни оьрчIал мурадру биттур буллалисса аьдатсса батIаву. Шиккува кIицI бан, Украиннал аьрщарай хасъсса аьралий операция байбивхьуния шинмай ва акциялуву хъунмур къулагъас дуллай бур Ватандалул мурадру буруччаврил ххуллий талатисса аьралийтурал оьрчIах.
Райондалул администрациялул ва идарарттал каялувчитурал щаллу бунни «Мурадирал елкалия» ливксса мурадру – аьмну кьуния мукьа оьрчIал мурад. Асар къархьуну къаличIлай дия мюрщултран буттахъал къулагъас диял хъанай дакъашиву. Мурадру бартбивгьуну махъ, райондалул бакIчи Зураб Куччаевгу чансса хIаллайсса «буттауссу ­Зураблуйн» кIура авну, мюрщулт бувцуна администрациялул къатравух экскурсия бан. Вайгу хIат-хIисав дакъа ххарину, ванал лагмагу лавгун, буттащал кунма, гъирарай жаплий байкъалитIавай бия.